મારી આંગળીનો નખ --------દીપક ત્રિવેદી

મારી  આંગળીનો  નખ --------દીપક ત્રિવેદી

મને   કાયમી   નડે   છે   મારી   આંગળીનો  નખ !
નથી   ઘોળાતું    એટલે    આ   જીવતરનું    વખ  !

રેશમી  અડપલાંમાં  નખ    નડી   જાય   ભૈ ......  ભારે કઠણાઈ .....
આવેલું   સપનું    હળવેક    ખડી  જાય   ભૈ ......  ભારે કઠણાઈ .....

રહે    કડેધડે    આંગળીનો   નખ   એ   જ   દખ ....!!
મને   કાયમી   નડે   છે   મારી   આંગળીનો  નખ !

શબ્દોને     લખવામાં  ખાંચ - ખુંચ   થાય ..... ભાઇ   કરવું   શું ?
છેલ્લે   આ   નખ   એનું   કામ   કરી જાય .... ભાઇ   કરવું   શું ?

નખની  આ  ઘટનામાં  ખોવાયો  અવતાર  મનખ ...
નથી   ઘોળાતું    એટલે    આ   જીવતરનું    વખ  !

-------------દીપક ત્રિવેદી

ઉજાગરા + વાયરા = અશ્રુવન -------દીપક ત્રિવેદી

ઉજાગરા + વાયરા = અશ્રુવન -------દીપક ત્રિવેદી

 આંખોમાં   લઈને   ઉજાગરા
ભટકે  છે   શ્વાસો    બહાવરા

કહી   દો  તો   ખોબલિયે  દેશું   અરમાનો
                      -- ને     કહેશો   તો   આંખોનાં   વન
મોરપિચ્છ    આવે   તો   ટહૂકા   પથરાશે
                     --  ને    સાથિયાઓ     પૂરશે    કવન ....

અમથા  ન  થાઓ  કઈ  આકરા
આંખોમાં     લઈને      ઉજાગરા ...
માગો  તો   મો ' લાતું    આપી  યે   દઈએ
                    --  ને     આપીએ    અમારા    રીસામણાં  !
તમને   રીઝવવા   તો , ગોકુળના  ગિરધારી
                   --  રાખ્યા      છે     દિવસો       સોહામણાં !
ફુંકાશે  રોમ - રોમ  વાયરા !
આંખોમાં  લઈને   ઉજાગરા !

----------દીપક ત્રિવેદી

           

મોળાવ્રત ( મોરકત ) રે ' તી છોકરીનું ગીત --------દીપક ત્રિવેદી

મોળાવ્રત    ( મોરકત ) રે ' તી  છોકરીનું  ગીત --------દીપક ત્રિવેદી 

ગોરમાનો    વર    કેસરિયો   રે   રંગે   રમવા   જાય ...

આગળપાછળ     પુતળિયું      રે   હાલકડોલક થાય ...

માંડ   જવેરા   વાવ્યા   એના  વાંભ - વાંભના  કોંટા ... 

પછી સરોવરના  કાંઠા  પર વરસ્યા      ગુલાબગોટા ...

ગોરમાનો   વર   વાંકડિયો    રે   ઝોલાં    એવાં  ખાય ... 

આગળપાછળ     પુતળિયું      રે   હાલક  ડોલક થાય .....

પહેરેલા      ઘરચોળે    સૈયર    ચાંદલિયાની     ભાત !

હું    ખેડૂની    છોરી     રે   ના    સમજી    એક્કે   વાત !

ગોરમાનો   વર    નાવલિયો    રે  ચણોઠડીની    ઝાંય ...

આગળપાછળ     પુતળિયું      રે      હાલકડોલક થાય .....

------------દીપક ત્રિવેદી 

કુંવારા મનનું ગીત ---------દીપક ત્રિવેદી

કુંવારા  મનનું  ગીત  ---------દીપક ત્રિવેદી

માઝમ - રાતે    પંખો    ફૂટી
                               પાંખો         રાતીચોળ  ....  બોલે   ટીટોડો !
ગામ  સફાળું   હાલક - ડોલક
                                પાદર  ગોળ - મટોળ ...   બોલે   ટીટોડો !
સવ્વામણના   ગીત    ઉઘલે
                                ગીતો      ઝાકમઝોળ ...  બોલે   ટીટોડો !
એક    હથેળી  -  કાંઠા    ઉપર
                                 ફરે    નહિ   ચકડોળ ...  બોલે   ટીટોડો !
જળમાંથી     જળ      પાંગરતું
                                  કૈં જળમાં હું તરબોળ ...  બોલે   ટીટોડો !
પાંચ   વાંભના    પૂતળાં જેવો
                                  દરિયો      ડામાડોળ ...   બોલે   ટીટોડો !
ઠેબાં   ખાતો    ઘૂમરાતો    ભૈ
                                  ઘરમાંથી      વંટોળ ....   બોલે   ટીટોડો !
ફૂલગુલાબી   સપના   સાજણ
                                  આંખોમાં    ઝબકોળ ...    બોલે   ટીટોડો !
જરા   આંખના    પલકારામાં
                                ચડી   ગયો   મચકોડ ....  બોલે   ટીટોડો  !
માઝમ - રાતે     પંખો   ફૂટી
                                પાંખો    રાતી     ચોળ ....   બોલે   ટીટોડો !

----------------દીપક ત્રિવેદી
 

વૈશાખી વાયરો વા ' તા પેહલાં --------દીપક ત્રિવેદી

વૈશાખી  વાયરો  વા ' તા  પેહલાં  --------દીપક ત્રિવેદી

અંધારું   રહેશે    અબોલ   ...એય   ... સાજણિયા
                                 અંધારું   રહેશે    અબોલ
આંખો   અધમીચેલી   ખોલ ... એય ... સાજણિયા
                              આંખો   અધમીચેલી   ખોલ
નીંદરમાં  લીલીછમ્મ  લહેરખી હશે  એનું  નામકરણ  કરશું  પતંગ
ચપટી વગાડતાં ' ક  પોપચા  ખુલે  એવી ઘટનાથી કરફયુનો  ભંગ
પડઘાને   અમથો  ના   ઠોલ ...  એય ... સાજણિયા
                               પડઘાને   અમથો  ના   ઠોલ

અંબોડે   ખીલેલી  વેણીના  સમ  કોઈ  સપનાની  વાત  નથી  મારી
શરણાયું    વાગે   કે    પડઘમ    હવે     ટેરવામાં   ખુલી   છે   બારી
ધણધણતો   વૈશાખી  ઢોલ ... એય ...સાજણિયા
                            ધણધણતો   વૈશાખી  ઢોલ !
અંધારું   રહેશે    અબોલ   ...એય   ... સાજણિયા
                                 અંધારું   રહેશે    અબોલ !

----------------દીપક ત્રિવેદી

ચંદનતલાવડીમાં ... ----------દીપક ત્રિવેદી

ચંદનતલાવડીમાં ...  ----------દીપક ત્રિવેદી

ચંદન  તલાવડીમાં  અઢળક  શ્રાવણ  મુશળધાર --
                         -- કે રૂમઝૂમ  કંકણનું  ઝૂમખડું ...
                         -- કે ઝલમલ  કંકણનું  ઝૂમખડું ..
રેશમની   દોરીના   છેડે   બાંધ્યો   ઝરમર  ભાર -
                         -- કે ઝમરખ   કંકણનું  ઝૂમખડું ..
                         --  ઝળહળ     કંકણનું  ઝૂમખડું ..
 તડકો  બંધો  પરોઢમાં રે ..   પરોઢિયાને   માનસરોવર    પાળ
                                             -- કે છલકે રાખે  છલછલ પાળ
ઘરચોળાંની     ભાત્યું    બાંધો ...   ભાતે  બાંધો  રૂડીરૂપાળી રાત
                                            -- કે ફરકે  શમણાંઓ  પાતાળ
કેસુડાંનો    ઢાળ   ઢોલિયો ,    લાવો    ચંદનહાર--
                         -- કે સળવળ   કંકણનું   ઝૂમખડું ..
                         -- કે પલપલ   કંકણનું   ઝૂમખડું ..
ચંદન  તલાવડીમાં  અઢળક  શ્રાવણ  મુશળધાર --
                         -- કે રૂમઝૂમ  કંકણનું  ઝૂમખડું ...
                         -- કે ઝલમલ   કંકણનું  ઝૂમખડું ...

ટહૂકો    ઉછળે    અંદરથી     રે   ઘૂઘવે   સાત   સમંદર   વ્હાલા
                                           --   આકુળવ્યાકુળ    શુક્નગીત
ચોમાસું   રેડાતું    મબલક,    આંખે   વાગે   તીરકામઠા   -  ભલા
                                           --  ભીનીભીની     ઘરની    ભીંત
ટહૂકો   પાંપણમાં   ઝીલાવા   ચઢી   જાવ   મોભાર -
                          -- કે મઘમઘ   કંકણનું  ઝૂમખડું ..
                          --  મબલખ    કંકણનું    ઝૂમખડું ..
ચંદન  તલાવડીમાં  અઢળક  શ્રાવણ  મુશળધાર --
                         -- કે રૂમઝૂમ  કંકણનું  ઝૂમખડું ...
                         -- કે ઝલમલ  કંકણનું  ઝૂમખડું ..

------------------દીપક ત્રિવેદી

           

પ્રથમ રાત્રિમિલન ----------દીપક ત્રિવેદી

પ્રથમ   રાત્રિમિલન ----------દીપક ત્રિવેદી

ધડક   ધડક    દિલ    ધડકે ,   સજના !
                     માંડ  સોગઠાં - ચોપાટું .....!
પલક   નેત્ર     પલ - પલ    થડકે   ને --
                            કંકુ      ફાટું - ફાટું  ....!
આજ     લગી     ક્યાં     કોઈ     પીતું
                      અમરતનો  સમદરિયો ....
ઘટ - ઘટ   પી  જા    અમને ,   આલ્લે  !
                       કુંભ  મજાનો  ભરીયો ....
ધનક ... ધનક ....  ઝાંઝરિયું   બલમા !
                        ઘુઘરિયાળી     વાટુ ......!
ધડક   ધડક    દિલ    ધડકે ,   સજના !
                     માંડ  સોગઠાં - ચોપાટું .....!
ઊછળકૂદ         ઈચ્છાના       શંફૂદ્રુમ
                          ઊગ્યા     પરસાળે ......
જાણે        ગુલાબ      ગોટો       ફૂટ્યો
                      અંતરના    અજવાળે  ......
છલક  શ્વાસ   સરવર ,       સાંવરિયા
                           રાખું    કોના  સાટુ ?
પલક   નેત્ર     પલ - પલ    થડકે   ને --
                            કંકુ      ફાટું - ફાટું  ....!!

------------દીપક ત્રિવેદી

વિરહિણી ગીત -----------દીપક ત્રિવેદી

વિરહિણી ગીત -----------દીપક ત્રિવેદી 

ઝરમર   ચંદનતલાવડી   કાંઠે  ઊગ્યા  ગુલમહોર  રે  ..... રામૈયારામ 

આદશ - ઓદશ    ચણોઠડીના  ગોટા    ચારેકોર    રે  ....  રામૈયારામ 

            ઘરચોળાંના   દેશમાં   રે  ઊગ્યા   શુકનગીત ;

            ઠણકું   ખાતાં   વાલમા   આડી   આવી  ભીંત !

તડકાની   પાંસળિયે   ફૂટ્યાં    ગલગોટાના   પ્હોર  રે ....  રામૈયારામ  

મારામાંથી   બહાર   કૂદતો   ધ્રુજે   થરથર    મોર   રે .... રામૈયારામ  

             મારા   મઘમઘ   શ્વાસના   ફૂટેલાં   ઓછાડ ; 

             ચકલીભીની   ચીસનાં   હાંફે    પહાડે- પહાડ !

ઉઘાડા    કંકણની      ફરતે    બાંધો     રેશમદોર     રે ....   રામૈયારામ 

સાંજ   ઢળ્યે   ઉઘાડ   આભમાં  માલીપા  ઘનઘોર  રે .... . રામૈયારામ 

ઝરમર   ચંદનતલાવડી   કાંઠે  ઊગ્યા  ગુલમહોર  રે  ..... રામૈયારામ 

-----------દીપક ત્રિવેદી 

      

કાવ્યસુંદરીને પ્રશ્ન ------દીપક ત્રિવેદી

કાવ્યસુંદરીને  પ્રશ્ન ------દીપક ત્રિવેદી

કહો સુંદરી  !  ક્યાં  લગ   જાવું  ?
ભીતર ... કાંઠે .. જલવત  થાવું  !

                  સામે   છેડે   શબ્દ   મુલાયમ
                  ઊઘડે  મોતી  માફક  વાલમ ....

ઝળહળ   થાવું    ને   મલકાવું  !
કહો સુંદરી  !  ક્યાં  લગ   જાવું  !!

                  વૃન્દાવનના   તવ   ઝાંઝરીયા
                  જાણે     ઘૂઘવતા    સમદરિયા ...

ખળખળતું  થઇ  ક્યાં વહી જાવું  ?
કહો સુંદરી  !  ક્યાં  લગ   જાવું  ?

---------દીપક ત્રિવેદી

તમે - અમે ------------દીપક ત્રિવેદી

તમે - અમે ------------દીપક ત્રિવેદી

તમે   તો   શ્યામ   રંગનું  વાદળ !
અમે  તો   ઝાંઝર   હાંફળ - ફાંફળ !

તમે   તો  ઘટઘટમાં    ભરિયા  દરિયા   રે   સાંવરિયા
અમે  તો   ખાલીખમ  પનઘટ  ગગરિયા રે   સાંવરિયા

તમે   તો  કમળપત્ર  પર  ઝાકળ !
અમે   તો  વપરાયેલી   બે -- પળ !

તમે   તો     પલપલમાં    મુરલી   અરધી  રે  પાતળિયા ....
અમે   તો     ઘુઘરિયું       અરધી -- પારધી રે પાતળિયા ....

તમે    તો  મોરપીચ્છમાં  ખળખળ !
અમે   તો   આંખોમાં     યમુનાજળ !!

-----------દીપક ત્રિવેદી

શ્યામ + મોરપીચ્છ = ગોપી —દીપક ત્રિવેદી

શ્યામ + મોરપીચ્છ = ગોપી —દીપક ત્રિવેદી

શ્યામ ! તમે મોરલી વગાડો હું નાચું !
શ્યામ ! તમે કાગળિયો ખોલો હું વાંચું !

ઓચિંતા ડાળ એક ઝૂલી રે સંગલાલ
ગુલમ્હોરી સપનાઓ વાગ્યા …..
ભીતરમાં પાંદડિયું ખુલી રે સંગલાલ
છલ – છલ કસુંબાઓ માગ્યા …..

શ્યામ ! તમે મોરપીચ્છ ખોંસો ઈ સાચું !
શ્યામ ! તમે મોરલી વગાડો હું નાચું !

આંગણમાં વેરાણા મોતી ઓ મણીયારા
મોતીડે મોતીડે ધબકારાં ……!
ધબકારાં કેમ કરી વીણું ઓ મણીયારા
ધબકારાં આંખ્યુંના પલકારાં ……!

શ્યામ ! તમે બોલો નહિ તો બધું કાચું !
શ્યામ ! તમે મોરલી વગાડો હું નાચું !

———-દીપક ત્રિવેદી

લાવ ચીતરું હથેળીમાં .... ---------દીપક ત્રિવેદી

લાવ ચીતરું હથેળીમાં .... ---------દીપક ત્રિવેદી

લાવ ,  ચીતરું   હથેળીમાં  દરિયો ...
એક  દરિયો , જે  મારામાં  ભરિયો ...

        એક  મોજામાં  નામ - સરનામું  લખીશ ;
        રેત - કાંઠાનું    ગામ   પરબારું  લખીશ ....
અંગ - અંગના   મરોડે   પાથરિયો ,
એક  દરિયો , જે  મારામાં  ભરિયો ...

        છીપ,   મોતી,   પરવાળાં,  હલ્લેસું,   હોડી ...
        આવ , કાંઠાના  બંધનને  સઘળાં  તરછોડી ..
છેક   નભમાંથી    ઘરમાં     ઊતરિયો ,
એક   દરિયો , જે   મારામાં    ભરિયો ...

        જળ   ઊછળે   તો   છાલકને  ઝીલી  લઈશ
        તારા  દોમ - દોમ  વ્હાલપમાં   ગાંડી થઈશ
સાવ    ઘરના    ઉંબરમાં    સાંભરિયો ....
એક    દરિયો ,   જે   મારામાં  ભરિયો ...

          લાવ ,    ચીતરું    હથેળીમાં    દરિયો ...
          એક    દરિયો ,   જે    મારામાં  ભરિયો ...

---------દીપક ત્રિવેદી

       

ચુંદડી ભીંજાણી નૈ ----------------દીપક ત્રિવેદી

ચુંદડી  ભીંજાણી નૈ ----------------દીપક ત્રિવેદી

ચુંદડી    ભીંજાણી    નૈ ......
ગગરિયા  છલકાણી  નૈ .....
નજરની  સોંસરવા  જઈ
નજરિયા   મંડાણી   નૈ ....

ઊઘડતો   શ્રાવણ   કોરો .... ધૂળની   ડમરી   ઉડે  !
ઘૂંઘરું    પાસે    ઝુકી  ...    ભ્રમરની    પંખો    બૂડે !

નદીનાં    રેતલ    કાંઠે
હજૂ   હું    મુંઝાણી   નૈ ....
ચુંદડી    ભીંજાણી    નૈ ......
ગગરિયા  છલકાણી  નૈ .....

દેહના    ગુંબજ   ઉપર .... નથી   ખાબકતી    હેલી .....
શરમ  કે   સાચુકલાં  પણ  નથી   વીંટળાતી   વેલી  !

હરખને    પડખામાં    લઇ
મુઈ   હું   હરખાણી   નૈ ....
ચુંદડી    ભીંજાણી    નૈ ......
ગગરિયા  છલકાણી  નૈ......

----------દીપક ત્રિવેદી
 

પહેલો વરસાદ -----------દીપક ત્રિવેદી

પહેલો વરસાદ -----------દીપક ત્રિવેદી

મને   પહેલાં    વરસાદમાં   પલળવું    ગમે
મને   તારી     સાથે   એમ     મળવું    ગમે

તારી  આંખોમાં  હોય  સાત - દ્વારિકા  ગામ
એક    તારું   રટણ    કૈંક    તારું    છે   નામ

મને     કંચનજંઘાથી      ખળખળવું      ગમે
મને   તારી     સાથે   એમ     મળવું    ગમે

મારી   આંગળિયે   ઓચિંતા    સપના  ફૂટેલાં
વળી  ઓસરિયે  મોરલાના   ટહૂકાં    ઝીલેલાં

મને     તારા     કાંઠેથી     ઝળહળવું     ગમે
મને   તારી     સાથે   એમ     મળવું    ગમે

-----------દીપક ત્રિવેદી

હું હરખપદુડી છોરી ....! ------દીપક ત્રિવેદી

હું    હરખપદુડી    છોરી ....! ------દીપક ત્રિવેદી

હું    હરખપદુડી    છોરી ....!
હું    ઝાલું  રેશમ - દોરી ....!
                      હું  આંખે  આંજુ  તમને ....
                      હું   શું  પૂછું   સાજનને ....?
હું   પરથમથી   કટ્ટકોરી  !
હું    હરખપદુડી    છોરી  !
                     ઈ    તડકેથી    સંચરવું  ;
                     ઈ   આંખોમાં  જળ ભરવું ...
હું    ગુલમહોરોમાં મ્હોરી   !
હું    હરખપદુડી    છોરી ....!
                    આ શ્વાસ  કિંયા પાથરવા ?
                    આ  અશ્રુઓ  ક્યાં  ધરવા  ?
હું   હરખુડી   નસ - ધોરી !
હું    હરખપદુડી     છોરી  !!

------------દીપક ત્રિવેદી
                           

મુંબઈનગરીમાં ભૂલા પડેલા વા'લાજી ---દીપક ત્રિવેદી

મુંબઈનગરીમાં  ભૂલા પડેલા વા'લાજી  ---------દીપક ત્રિવેદી

મુંબઈ   નામે   નગરીમાં   વ્હાલાજી   ઝોલાં   ખાય ....
ફૂલપદમણી   જેવી   છોરી   જોઈ  જોઈ  મલકાય .. !

અરધે - કાંઠે  લપસી  પડતાં  બોલે  ' મેડમ સોરી '   !
' થેન્કયૂ , મેન્શન નોટ '  કહીને  રણકે  મુંબઈ ગોરી   !

ચશ્મા   પહેરી   દરિયામાં    વ્હાલાજી   ગીતો  ગાય  !
મુંબઈ   નામે   નગરીમાં   વ્હાલાજી   ઝોલાં   ખાય ....

ક્યાં મળશે  જળનદી  અમોને  ક્યાં  મળશે  પગથાર ?
ઝુંપડપટ્ટીમાં     જોયેલાં      સપના     પારાવાર .....!

જળવત   જીવી   જાવામાં  વ્હાલાજી  વરસી   જાય  !!
મુંબઈ   નામે   નગરીમાં   વ્હાલાજી   ઝોલાં   ખાય ....

------------------દીપક ત્રિવેદી

જામનગરવાસીનું પ્રણયગીત -----------દીપક ત્રિવેદી

જામનગરવાસીનું   પ્રણયગીત -----------દીપક ત્રિવેદી

સપના  !  તારી  આંખો  જાણે   જામનગરનું   પૂર  --  અમે  હોબ્બેસ  તણાયા   છેક  વચ્ચોવચ્ચ   દરિયે  !
સપના  !  તારા  શ્વાસે  ટપકે   પંચવટી   ચોપાસ  -- અમે  તો .. હે .. ય .. તણાયા  મઘમઘતી  ઘૂઘરિયે  !

પવન ચક્કીનો  પવન સમયસર  વા'ય -- અને જો તમે ઉડો આકાશ -- લઇ જાજો રે કાગળ સખીયન .... !
પંચેશ્વરનો પડઘો જો પડઘાય--અચાનક શ્રીબાલાહનુમાન  આપણા થાય--લઇ જાજો રે શ્રીફળ સખીયન..!

સપના  ! તારા રણજિત રસ્તે  નાગમતીનું   ગામ -- અમે તો .. એ .. ય .. તણાયા નાગમતીને  તળિયે    !

થાક ચડે  તો મૂકો  હવાઈ  ચોક  -- અને ચાલો રે ઠેઠ  નગરમાં -- જ્યાં  છે  અનરાધારી  હૈયાનો વરસાદ !
લાલબંગલેથી  નીકળતા  લોક  તને  જો  પૂછે  --  તો  તું   રસ્તા  સાત   બતાવી   કહેશે  પરીકથા એકાદ !

સપના  !   તારી  આંગળિયુંમાં  કલરવતો   મનમોર -- અમે   બિન્દાસ્ત  તણાયા  જામનગરના  ફળિયે !
સપના  !  તારી  આંખો  જાણે   જામનગરનું   પૂર  --  અમે  હોબ્બેસ  તણાયા   છેક  વચ્ચોવચ્ચ   દરિયે  !

-----------દીપક ત્રિવેદી

મેળો ------------ દીપક ત્રિવેદી

મેળો  ------------  દીપક ત્રિવેદી

હૈયે -  હૈયું   દળાય   છે .... હાલ ..... હાલ ..... હાલ ....
મનખ  મેળો  ભરાય છે .... હાલ ..... હાલ ..... હાલ ....
        ચકડોળે    ચડ્યાં   કે  ચડ્યાં    આકાશમાં  ....  
        ઈચ્છાના  ગુબ્બારાં  છોડ્યા  કંઈ  આશમાં .....
વા ' માલીપા  વાય  છે .... હાલ ..... હાલ ..... હાલ ....
હૈયે -  હૈયું   દળાય   છે .... હાલ ..... હાલ ..... હાલ ....
        કોઈ  પકડે  કરતાલ ,  કોઈ  બેસુરાં   તાલ ....
        કોઈ  નમણીનાં  ગાલ  પરે  ઢોળે  છે વ્હાલ ....
કોઈ  છલછલ  છલકાય  છે .... હાલ ..... હાલ ..... હાલ ....
હૈયે -  હૈયું     દળાય     છે .... હાલ ..... હાલ ..... હાલ ....
        આભલાઓ    પહેરી    ગજગામિની   જાય ....
        કાચના     અરીસાઓ     જાણે     શરમાય .....
આખું   મલ્લક  મલકાય  છે  .... હાલ ..... હાલ ..... હાલ ....
મનખ    મેળો    ભરાય   છે .... હાલ ..... હાલ ..... હાલ ....

-----------દીપક ત્રિવેદી

 

કવિતા પર જુલમ કરતા કવિને ----દીપક ત્રિવેદી

કવિતા  પર  જુલમ કરતા કવિને ----દીપક  ત્રિવેદી

શબ્દચોકમાં    સળગાવો    રે    મીણબતી     વણઝાર
એક    કવિતા    દોડી   ગઈ    સમદરની    પેલે   પાર

દરિયાને    પૂછ્યું     તો    દરિયો    અંગુઠો    બતલાવે
વ્રુક્ષ  - પર્ણ   પણ  મુંગામંતર  બિન  પાણી  મર   જાવે

હાથવેંતમાં     લઇ     આવો     ઝાંઝરિયાનો    આધાર
એક    કવિતા    દોડી   ગઈ    સમદરની    પેલે   પાર

હશે     સામને     કાંઠે   કે   ધરતીમાં   ગઈ    સમાઈ  ?
રજવાડી    શબ્દોની     અંદર    ડૂસકાતી     પરછાઇ !!

પડછાયામાં    હોઈ    શકે    ના    પગલાંનો   આધાર !
એક    કવિતા    દોડી   ગઈ    સમદરની    પેલે   પાર !

અરધો   કાંઠો    ડહોળો   કે    અમૃતનો    આખો     કૂંપો
છેક  સમયની  સોંસરવા   જઈ  ગળા  સુધી  તો   ખૂંપો !

તમે    કવિતા   પામી   શકશો     ક્ષણમધ્યે    ઝંકાર ...
એક    કવિતા    દોડી   ગઈ    સમદરની    પેલે   પાર.

------------દીપક ત્રિવેદી

ઇન્ગ્રેચીમાં કરજો -----------દીપક ત્રિવેદી

ઇન્ગ્રેચીમાં  કરજો -----------દીપક ત્રિવેદી

ઇન્ગ્રેચીમાં   કરજો   મારા  શ્વાસોનો   તરજૂમો  !
ગુજરાતીમાં  નૈ   ઊકલે  રે  અક્ષર  અક્ષર ડૂમો  !

ઇન્ગ્રેચીમાં  ડૂસકાં  ન  ફાવે  તો  રે ' વા  દેજો ...
ગુજરાતીમાં  ઈ  અક્ષરને   સાત  સલામી  દેજો  !

સપનાં   ટોળા - મોઢે  રેતીમાં  છે  ચૂમો - ચૂમો  !
ગુજરાતીમાં  નૈ   ઊકલે  રે  અક્ષર  અક્ષર ડૂમો  !

ઇન્ગ્રેચીમાં   આંસુ    ટીઅરગેસ   થઈને   નડશે  !
ગુજરાતીમાં આંસુ ઝાકળ - ધુમ્મસ  થઇ નીતરશે !

રસ્તો - બસ્તો  ગુમ થાય  તો  કેડી - કેડી  ઘૂમો !
ઇન્ગ્રેચીમાં   કરજો   મારા  શ્વાસોનો   તરજુમો  !

-----------દીપક ત્રિવેદી

તારી આંખમાં જોયેલ ચોમાસાનું ગીત --દીપક ત્રિવેદી

તારી  આંખમાં જોયેલ ચોમાસાનું ગીત --દીપક ત્રિવેદી

હાય   રે ! તારી   આંખમાં   મોતીસેર !
હાય   રે ! હું   તો   દોડતો  ઝડપભેર !

અલપઝલપ    વીંઝતો    જાતો .....વીંધતો    જાતો .....
           સપનાઓનાં .....   ઘટનાઓનાં    ઝાંઝરિયાળા    દેશ  .......!
અલકમલક    પૂછવા   દોડું  ..... ભાગવા   દોડું ....
             જાણે    ઉડી     આંખમાં    વાગે     પદમણીનો    વેશ .....!

હાય   રે !  આખા   ચોકમાં  વેરવિખેર !
હાય   રે !  હું   તો   દોડતો   ઝડપભેર !

હાલકડોલક     છાલક    વાગી  ...... આંખમાં  વાગી  ......
            આંખ   વચ્ચેના   ગામમાં   વાગી .... ગામના   લોકો  ગુમ !
લટકમટક     નદિયું      ડોલી ....     ચૂડલી      બોલી  ....
            ઘાસ     વચ્ચાળે    આભ    વચ્ચાળે  .... થાય  રે  બૂમાબૂમ !

હાય   રે !  ચટક   ચડતું    ઝામણઝેર !
હાય   રે !    હું  તો  દોડતો  ઝડપભેર !

-----------દીપક ત્રિવેદી

સપનાપુરાણ--------------દીપક ત્રિવેદી

સપનાપુરાણ--------------દીપક ત્રિવેદી

ગઢનો   દરવાજો   ખોલ્યો  - ને -   સપનાં   હુડૂડૂડૂહુસ !
મને    શૂટ - બૂટમાં     દેખીને    કરતાં    રે     ગુસપુસ !

એક     ઘોડાનું     સપનું     મહેંદીલા    હાથેથી   ઊડ્યું  !
માંડ     માંડ    કેડેથી     ઝાલી    પાછું    એને     ગુડ્યું  !

મારા    હાળા  !    સપનાં     છીંડુ   દેખી    કરતા   ઘુસ !
                                                સપનાં    હુડૂડૂડૂહુસ !!
ગઢનો   દરવાજો   ખોલ્યો  - ને -   સપનાં    હુડૂડૂડૂહુસ  !

વળી     એક     ઊંધામણના     સપનાને   પાંખો   ફૂટી  !
જંતરમંતર      હું    બોલ્યો    ને   ગધની   પાંખો   તૂટી !

મને    આંટતા    સપના    લઘરાંવઘરાં      મખ્ખીચુસ !
                                                 સપનાં   હુડૂડૂડૂહુસ !!
મને    શૂટ - બૂટમાં     દેખીને    કરતાં    રે     ગુસપુસ !

ઊભી   પૂછડીએ   દરવાજેથી    ઊભી  પૂછડીએ   ભાગ્યો ....
ખૂણિયા     સપનાઓનો     ખાંચો     અંગૂઠામાં    વાગ્યો .....

મને    દોડતો     જોઈ - ને -   સપનાં    બંધબારણે  ખુશ !
                                                   સપનાં   હુડૂડૂડૂહુસ !!
ગઢનો    દરવાજો    ખોલ્યો  - ને -   સપનાં    હુડૂડૂડૂહુસ !

---------------દીપક ત્રિવેદી

તંબૂરો + ટપુભગત = વિષકન્યા --------- દીપક ત્રિવેદી

તંબૂરો + ટપુભગત = વિષકન્યા --------- દીપક ત્રિવેદી

 ટપુભગતને    તંબૂરાનો    શોખ    ભયંકર    લાગ્યો  !

પડઘો  પડશે  તો  કહેશે   કે  અવાજ   આવ્યો   ગેબી !
સપનામાં  પણ   છળી   ઊઠશે   જોતાં   એક  જલેબી !!

 ટપુભગતનો    જીવ   અભાગી   રહી  રહીને    જાગ્યો !
ટપુભગતને     તંબૂરાનો      શોખ    ભયંકર     લાગ્યો !

દરિયો    તરવા   ટપુ  ભગત   તંબૂરો   હા ' રે  લેશે....
' તું   હી    મેરા   જીવનસાથી '  તંબૂરાને     કે ' શે ....

આમ    છતાંયે   ટપુભગતને     જીવતરકાંઠો    વાગ્યો !
ટપુભગતને     તંબૂરાનો     શોખ     ભયંકર    લાગ્યો  !

વિષકન્યાએ     ટપુભગતને    ચોક    વચાળે    પીધાં ....!
આટઆટલું     થયું    છતાંયે     ગોકીરા    ના    કીધાં .....!

વિષકન્યામાં     લીન     ટપુએ     તંબૂરો   ના  માંગ્યો  .....!
ટપુભગતને    વિષકન્યાનો     રંગ     ખરેખર   લાગ્યો  !!

-------------દીપક ત્રિવેદી



 

ઝમકું ડોશીને અને સપનાઓ ---દીપક ત્રિવેદી

ઝમકું ડોશીને અને સપનાઓ ---દીપક ત્રિવેદી

ઝમકું   ડોશીને   પૂછો   કે   સપના   કેવાં   લાગે  ?
ઝમકું   ડોશી   એમ  ભણે  કે  પરિયું   જેવા લાગે  !

સપનાને   ઉલાળો  તો  સપના થૈ  જાતા  વાદળ  !
આંગળિયુંમાં    બાંધો    તો   ભૈ  સપના  કંકુકાગળ !

સપનાનું    ચાંદરડું    લેવા   ઝમકું   ડોશી   ભાગે !
ઝમકું   ડોશીને   પૂછો   કે   સપના   કેવાં   લાગે  ?

સપનાને    પંપાળો  તો   સપનાને    ઉગે    મૂછો  !!
મારા રોયા !  સપના  વિશે  કાંય  મને  ના  પૂછો   !

નીંદરમાંથી   ઉઠી  સપના   દરિયો   પીવા  માગે  !
ઝમકું   ડોશીને   પૂછો   કે   સપના   કેવાં   લાગે  ?

--------------દીપક ત્રિવેદી

અંધકારના કવિ અમે ——–દીપક ત્રિવેદી

અંધકારના કવિ અમે ——–દીપક ત્રિવેદી

અંધકારના કવિ અમે તો અંધકારને વરિયે !
અંધકારનાં સાથળ ઉપર ઠીક પડે તે કરિયે
અંધકાર તો દરિયો ….
અંધકાર તરવરિયો …..
અંધકાર સાંવરિયો …..
અંધકારની છાતી ઉપર અંધકાર પાથરિયે !
અંધકારની ચાબૂક ઝાલી રથમાંથી ઉતરિયે !
અંધકાર તો ખણખણ …..
અંધકાર તો ધણણણ ……
અંધકાર તો જણણણ ……
અંધકાર ને ક્યાં છે કાંઠા ભીતરમાં પરહરિયે !
અંધકારના આલિંગનમાં આવોને મધદરિયે !
અંધકાર તો હુક્કો …..
અંધકાર જળકુક્કો ……
અંધકાર નિજભુક્કો ……
અંધકારના છીએ પ્રવાસી તડકામાં થરથરિયે !
અંધકારની લિપિ ઉકેલી બાંધી દઈ ઘુઘરિયે !
અંધકાર ખીસકોલી …..
અંધકાર ઘરખોલી …..
અંધકાર રંગોલી …..
અંધકારની પાંખો વચ્ચે આંખોનું જળ ભરિયે !
અંધકારની આંગળીયેથી ક્યાં જઈને ફરફરિયે !

અંધકારના કવિ અમે તો અંધકારને વરિયે !
અંધકારનાં સાથળ ઉપર ઠીક પડે તે કરિયે !

——————-દીપક ત્રિવેદી

Posted in Uncategorized | Leave a comment

શ્યામ + મોરપીચ્છ = ગોપી ——–દીપક ત્રિવેદી

શ્યામ + મોરપીચ્છ = ગોપી ——–દીપક ત્રિવેદી

શ્યામ ! તમે મોરલી વગાડો હું નાચું !
શ્યામ ! તમે કાગળિયો ખોલો હું વાંચું !

ઓચિંતા ડાળ એક ઝૂલી રે સંગલાલ
ગુલમ્હોરી સપનાઓ વાગ્યા …..
ભીતરમાં પાંદડિયું ખુલી રે સંગલાલ
છલ – છલ કસુંબાઓ માગ્યા …..

શ્યામ ! તમે મોરપીચ્છ ખોંસો ઈ સાચું !
શ્યામ ! તમે મોરલી વગાડો હું નાચું !

આંગણમાં વેરાણા મોતી ઓ મણીયારા
મોતીડે મોતીડે ધબકારાં ……!
ધબકારાં કેમ કરી વીણું ઓ મણીયારા
ધબકારાં આંખ્યુંના પલકારાં ……!

શ્યામ ! તમે બોલો નહિ તો બધું કાચું !
શ્યામ ! તમે મોરલી વગાડો હું નાચું !

———-દીપક ત્રિવેદી

અધૂરી દંતકથાનું ગીત ———–દીપક ત્રિવેદી

અધૂરી દંતકથાનું ગીત ———–દીપક ત્રિવેદી

સપનાદેની દંતકથા વત્તા હું કહું તો વડલો ….વત્તા હું કહું તો દરિયો …વત્તા હું કહું તો વત્તા …વત્તા …વત્તા

ઝરણવત્ત આંસુને કિચૂડ – કિચૂડ કોશ ઉપાડે …ખમ્મા નાચે કંકુ થાપા …ખમ્મા ટપકે લોહીધાર …..
…(કે)… લાગે સવ્વામણનો ભાર ….

વડવાયુંમાં અટવાયેલાં ચહેરાઓ અધધધ …રહરહ રૂએ પાદર ઝાંપા …ખમ્મા આંખો અનરાધાર ……
…(કે)… લાગે સવ્વામણન ભાર ….

સપનાદેની ભીંતકથા વત્તા હું કહું તો તડકો ….વત્તા હું કહું પાંદડિયો …વત્તા હું કહું તો વત્તા …વત્તા … વત્તા

ચકડવકળ ડોળાંને ઘૂ …ઘૂ …કબૂતરો સંતાડે … હાલકડોલક ધૂળિયા રસ્તા …સુ …સુ …બોલે ઝંઝાવાત …
…(કે) … અધ્ધરપધ્ધર લટકે રાત …
અડધા ઠૂંઠા અડધા બૂંઠા ચહેરાઓ ડાળીમાં માથાં – ધડ વિના ચકમક્તા …ઉઠે ઊંધાં પગલા સાત ….
…(કે) …ખખડે ચૂડલાં ભડકાંભાત …

સપનાદેની દંતકથા વત્તા હું કહું તો ભડકો ..વત્તા હું કહું તો ટેકરિયો ..વત્તા હું કહું તો વત્તા …વત્તા ..વત્તા
સપનાદેની દંતકથા વત્તા હું કહું તો વડલો ….વત્તા હું કહું તો દરિયો …વત્તા હું કહું તો વત્તા …વત્તા …વત્તા

—————-દીપક ત્રિવેદી

દર્દ મળે તો ઘૂંટો ————–દીપક ત્રિવેદી

દર્દ મળે તો ઘૂંટો ————–દીપક ત્રિવેદી

 

 દર્દ મળે તો ઘૂંટો

                  — જીવનમાં એવું ઘૂંટો ….

                                — જીવન આખું  બની જાય ચંદનવન ……

લાગ મળે તો લૂંટો …..

                 – સાંજ મજાની લૂંટો …….

                              —  કે સઘળા શ્વાસો થઇ જાશે વૃંદાવન ……..

અચરજના હીંડોળે ઝૂલી ઝટપટ દોડી જાય 

શું છે એવું જીવનમાં કે જીવવાનું મન થાય ?

વાદળ માફક તૂટો ….. 

                 – અનરાધારે તૂટો 

                            — કે ધરતીના કણકણમાં થાતું ગુંજન ……..

દર્દ મળે તો ઘૂંટો …..

                 – જીવનમાં એવું ઘૂંટો ……

                           – કે જીવન આખું  બની જાય ચંદનવન ……..

દરિયા વચ્ચે પડતું મેલી શું પામો છો એમાં ?

ટહૂકાની ભાષાના અક્ષર આડાઅવળાં જેમાં !

ફૂલ બગીચે ચૂંટો ……

                 – મોજ પડે તો ચૂંટો …….

                            — કે પાંખોમાં ઓગાળી નાખો તનમન ……

દર્દ મળે તો ઘૂંટો ……

                 – જીવનમાં એવું ઘૂંટો ………

                           – કે જીવન આખું  બની જાય ચંદનવન …….

 

                 

   ————————-  દીપક ત્રિવેદી

રસિયા તારા ચોકમાં ————દીપક ત્રિવેદી

રસિયા તારા ચોકમાં ————દીપક ત્રિવેદી

રસિયા ! તારા ચોકમાં રમ્મવાને રાસ -
ઝાંઝર મેં તો પગમાં બાંધ્યા રે લોલ !
રસિયા ! તારા હાંફવાને લગતા ઈ શ્વાસ -
ઝબફ દઈ હાથે ઝાલ્યા રે લોલ !

રસિયા ! તારા હેમ – હિંડોળે આજ -
હીંચકવા હેલે ચડી રે લોલ !
રસિયા ! તારા અંતરભીના સાજ -
ઉઘાડી હું દડદડ દડી રે લોલ !

રસિયા ! તારા ઊંચેરા અજવાસ -
ધબકતાં સાગર સમા રે લોલ !
રસિયા ! તારા રૂપકડાં આવાસ -
રણકતાં ઝાંઝર સમા રે લોલ !

રસિયા ! તારા રંગ ભીના અણસાર -
ઝીલીને મેં કમખે ટાંક્યા રે લોલ !
રસિયા ! તારા ઉછીના ધબકાર -
પાલવડે બાંધી રાખ્યા રે લોલ !

રસિયા ! તારા ચોક્માં રમ્મવાને રાસ -
ઝાંઝર મેં તો પગમાં બાંધ્યા રે લોલ !

——————-દીપક ત્રિવેદી

ગધના પાસે ગધની બેઠી —————-દીપક ત્રિવેદી

ગધના પાસે ગધની બેઠી —————-દીપક ત્રિવેદી

ગધના પાસે ગધની બેઠી સોળ કળાએ ખીલવા !
ગધનો પણ બેઠો છે એવો શ્રાવણ – ભાદર ઝીલવા !

ગધનો પૂછે ગધનીને આ સાત સમંદર પાર …
હોડી નૈ, હલ્લેસું નૈ, બસ તું અમને ઉતાર …

ગધનો ખોલે પ્રેમગઠરિયાં ગધની માંડે હીલવા !
ગધના પાસે ગધની બેઠી સોળ કળાએ ખીલવા !

ગધનો ઝીંકે આડાઅવળી પ્રેમ-બ્રેમની વાત !
ગધની જાણે બનતી જાતી મેઘધનુષી જાત !

કોઈ દિવસ આજે ગધની માંડી સપના છીલવા …
ગધના પાસે ગધની બેઠી સોળ કળાએ ખીલવા …

—————-દીપક ત્રિવેદી

ગધના – ગધનીનાં ગીતો ——————દીપક ત્રિવેદી

ગધના – ગધનીનાં ગીતો ——————દીપક ત્રિવેદી
ગધનાની આંખોમાં છલકે સરવરિયા બે-ચાર, ગધની એમાં ડૂબી જાય …
ગધનો ખીલે સોળકળાયે નદિયુંની મોજાર … ગધની એમાં ડૂબી જાય …
કમળ એટલે ગધનો
ગધની કમળ પાંદડી જેવી !
વમળ એટલે ગધનો
ગધની ગતિશાસ્ત્રની દેવી !!
ગધનો ઝીલે ઝરમર ઝરમર વરસે અનરાધાર … ગધની એમાં ડૂબી જાય ..
ગધનાની આંખોમાં છલકે સરવરિયા બે – ચાર … ગધની એમાં ડૂબી જાય …..
કોઈ બગીચો ગધનો
ગધની એના ફરતી વંડી !
મઘમઘ જંગલ ગધનો
ગધની એની તો પગદંડી !
ગધનો ફુગ્ગો ફૂલણશીનો ફૂટે પારાવાર … ગધની એમાં ડૂબી જાય …
ગધનો ખીલે સોળકળાએ નદીયુંની મોજાર .. ગધની એમાં ડૂબી જાય ..
શબદ એટલે ગધનો
ગધની થાતી કનોમાતર !
પવન એટલે ગધનો
ગધની એના ફરતી ચાદર !
ગધનો અરધો પાણી જેવો અરધો છે પગથાર … ગધની એમાં ડૂબી જાય …
ગધનાની આંખોમાં છલકે સરવરિયા બે – ચાર … ગધની એમાં ડૂબી જાય …
——————દીપક ત્રિવેદી

બગાસાચતુષ્ટય ————–દીપક ત્રિવેદી

બગાસાચતુષ્ટય ————–દીપક ત્રિવેદી
ગધનો બગાસાનો ભારે શોખીન,
એક પછી એક ખાય એવા બગાસા કે અલકાપુરીમાં જઈ દોડે .
પહેલા બગાસે હેમ-હિંડોળા આવ્યા,
મુઠી એક ચોખા લઈ એને વધાવ્યા ..
ગધનો બગાસામાં ભારે તલ્લીન,
એક પછી એક ખાય એવા પતાસા (કે) સમખાવા મુખ ન મરોડે !
બીજા બગાસે તો મેનકા પલાણી,
થઇ જવું ઈચ્છાનું લાલઘુમ રાણી ….
ગધનો બગાસાનો ભારે આધિન,
એક પછી એક ખાય એવા દિલાસા (કે) પરપોટા જેવું યે ફોડે !
ત્રીજા બગાસે તો વાણી વછૂટી,
કારુણ્યમૂર્તિની વીજળી ઝબૂકી !
ગધનો બગાસામાં ભારે ગમગીન,
એક પછી એક ખાય જીવતરના જાસા (તો ય) જીવતરને ઝાલે ન છોડે .
ચોથા બગાસે બધુ મૂકી દેવાશે,
અમૃત બસ અમૃત બસ અમૃત થઇ જાશે !
ગધનો બગાસામાં ભારે લયલીન,
એક પછી એક ખાય ઊંડાં નિસાસા (કે) ઈચ્છાનાં ગુંબજને તોડે .
ગધનો બગાસમાં થઇ જાશે લીન,
કોઈ પછી કોઈ રહે એવું બગાસું કે ગધનાની રહેશે ના જોડ ….
————–દીપક ત્રિવેદી

આત્મવિલોપન ———–દીપક ત્રિવેદી

આત્મવિલોપન ———–દીપક ત્રિવેદી

તમે દીવાને નાખો છો વીંજણો !
રહો કાચમાં-ને- વીંજો છો ગોફ્ણો !!

ગુલાબી અફવાને હાથમાં લઇ ….
કચડો છો ખુશ્બૂને બાથમાં લઇ ….

તમે વીંધો તે મનખો તો આપણો !
તમે દીવાને નાખો છો વીંજણો !!

એક પીડાના ઉજરડાં એવા પડ્યા …
ડગલા માંડ્યા તો મારગમાં નડ્યા …

પાળ્યો ઈચ્છાનો અજગર અળખામણો !
તમે દીવાને નાખો છો વીંજણો !!

થાક ઉતારી કૂવાનાં કાંઠે બેઠાં …
બધા આયુધો ઉતારી મુક્યા હેઠાં …

તમે આપ્યો છે ચાંદો લોભામણો !
તમે દીવાને નાખો છો વીંજણો !!

———–દીપક ત્રિવેદી

કણ – કણ મેં ——–દીપક ત્રિવેદી

કણ – કણ મેં ——–દીપક ત્રિવેદી

કણ-કણ મેં વો ગુંજ રહા હૈ બાજત હૈ ઘુઘરિયા …
મનકા મોતી તું બન જાવે તું બન જાવે દરિયા …

મેરે મનમેં તું હી તું હૈ તું હૈ મેરા સાવન …
તું ગોરસ, તું ધૈન હમારી તું મેરા વૃન્દાવન …

પલપલમેં ઝનકાર જગા દે નાચ ઉઠે પાયલિયા …
કણ-કણ મેં વો ગુંજ રહા હૈ બાજત હૈ ઘુઘરિયા …

તું ગોપાલક મેં હૂં ગ્વાલન સબકુછ હૈ યમુના-જલ …
તું સાગર મૈં એક સરિતા સબકુછ બાદલ – બાદલ !

તું સૂરજકા સૂરજપન દે ઉજજવલ બને નજરિયા !
મનકા મોતી તું બન જાવે તું બન જાવે દરિયા !!

——–દીપક ત્રિવેદી

હમ ભીગ ગયે ——–દીપક ત્રિવેદી

હમ ભીગ ગયે ——–દીપક ત્રિવેદી

બદરીયાં તૂટ ગઈ સાંવરિયા
હમ ભીગ ગયે
હમ ભીગ ગયે …….

ઇતના હૈ ફૈલાવ તુમ્હારા નૈનન કે મધુબનમેં ,
ઝૂમ ગઈ આખિર જલધારા ફૈલ ગઈ આંગનમેં …

ગઠરિયાં છૂટ ગઈ સાંવરિયા
હમ ભીગ ગયે
હમ ભીગ ગયે ……..
કિતના તુજે પુકારું કિતના લહર – લહર લહારઉં ?
હો – કર મીટ્ટી, વાયુ , જલધિ , તેજ વ્યોમ બન જાઉં !

નજરિયાં રૂક ગઈ સાંવરિયા
હમ ભીગ ગયે
હમ ભીગ ગયે ……!
બદરિયાં તૂટ ગઈ સાવરિયાં
હમ ભીગ ગયે
હમ ભીગ ગયે …….!

————-દીપક ત્રિવેદી

કોઈ ટુકડા કાગજ કા ————દીપક ત્રિવેદી

કોઈ ટુકડા કાગજ કા ————દીપક ત્રિવેદી

કોઈ ટુકડા કાગજ કા …….કોઈ કિતાબખાના …….
તો ભી સબકો જાના ……
કોઈ બનતે અમલપિયાલી …….કોઈ બડા મયખાના …….
તો ભી સબકો જાના ……..

એક લિપેટે મલમલ જૈસા એક લિપેટે વલ્કલ
એક હરિ કે પાસ ન બૈઠ દૂજા જનમસફલ ……

કોઈ મૌન લગાકે બૈઠા …..કોઈ મધુરા ગાના
તો ભી સબકો જાના ……

નિશ દિન તું બૈઠા પથ્થરમેં નહીં ડૂબા નહીં પાયા …..
તુને જો કુછ પાયા હૈ વો એક ઘડી કા સાયા …..

કોઈ માંગત બુંદ – બુંદ …… કોઈ દરિયા પાના ….
તો ભી સબકો જાના ……
કોઈ ટુકડા કાગજ કા ……. કોઈ કિતાબખાના ……
તો ભી સબકો જાના …..
તો ભી સબકો જાના ……
—————દીપક ત્રિવેદી

ગિરિધર આવે રે !————-દીપક ત્રિવેદી

ગિરિધર આવે રે !————-દીપક ત્રિવેદી

તોરણિયા બંધ જાવે ગિરિધર આજ અમારો આવે
મનકો કિતના ભાવે ગિરિધર આજ અમારો આવે

અધકચરી આંખોમાં ઝલમલ ઝલમલ તેજ અચાનક
કોણ તોડતું દ્વાર વચાળે મબલખ મૌન પ્રભાવક

લોચનિયા ખુલ જાયે ગિરિધર આજ અમારો આવે
તોરણિયા બંધ જાવે ગિરિધર આજ અમારો આવે

એના પગલે -પગલે પ્રગટે અજવાળાંનો સૂરજ
જાણે મેહંકી ઉઠે ઓલી સાંજકટાણે ગોરજ

પલપલ મુરલી ગાવે ગિરિધર આજ અમારો આવે
મનકો કિતના ભાવે ગિરિધર આજ અમારો આવે

————-દીપક ત્રિવેદી

શબ્દપિંડની એક છોકરી ———–દીપક ત્રિવેદી

શબ્દપિંડની એક છોકરી ———–દીપક ત્રિવેદી
એ …..ય ….છોકરી –
આંખ્યુનાં ઉલાળે હીંચકા ખાય
ઝૂલ્ફોના ઉછાળે હીબકાં ખાય …..
એ ….ય ….છોકરી –
હેઈસો …હેઈસો …નાદ વચ્ચાળે ફુલગુલાબી
હેઈસો …હેઈસો …સાંજકટાણે ફુલગુલાબી
એ …ય …છોકરી –
નાવ ડૂબે છે , પગ ધ્રુજે છે ,લે હલ્લેસું !
અંદરખાને , કાંઈ સુઝે છે , લે હલ્લેસું !
એ …ય …છોકરી –
હળવેથી હાલ,વ્હાલ ઢોળાતું જાય, તારા ઝાંઝરે
હળવે પંપાળ, કેશ હળવેથી ઢાળ, તારા પાદરે
એ …ય …છોકરી –
જરા પાંપણ પટકાવ, એક સુંદરવન થાવ ઓ પરિન્દા !
અહીં નાખો પડાવ, ગીત ગુલાબી ગાવ ઓ પરિન્દા !
એ …ય …છોકરી –
કોઈ સપના વીંટાળો
ડાળ ઝૂલમ્ – ઝૂલે
કોઈ બાંધોને માળો
ડાળ ઝૂલમ્ – ઝૂલે
એવો આવ્યો ઉનાળો
ડાળ ઝૂલમ્ – ઝૂલે
કોઈ કૂવાને ગાળો
ડાળ ઝૂલમ્ – ઝૂલે
એ …ય …છોકરી –
ઉખાણું મેલ તારા વીંટી – વલયમાં …
શૂન્યને ધકેલ તારાવીંટી -વલયમાં …
એ …ય …છોકરી –
વલય એટલે લયનો ચાળો
વલય એટલે એક ઉછાળો
વલય એટલે બમ્-બમ્ ભોલે
વલય એટલે જીવતર ઝોલે
વલય એટલે પડઘા-પાતર
વલય એટલે કાનો – માતર
વલય એટલે વલય – વલય
વલય એટલે પ્રલય – પ્રલય
એ …ય …છોકરી–
પ્રલય – પરિન્દા તું પ્રલયરૂપ અવતાર
નાદબ્રહ્મમાં તું અહો – રૂપ આધાર
એ …ય …છોકરી –
નાદબ્રહ્મ નાભિનો જળમાં
શિવ-સરીખો શબ્દ કમળમાં
શબ્દ ઝીલવો અનરાધારે
શબ્દ ઝીલવો હારે – હારે !
શબ્દપિંડની એક છોકરી
શબ્દપિંડની એક છોકરી
એક છોકરી
એ …ય …છોકરી –
હે !! છોકરી …..
————દીપક ત્રિવેદી

સોનપરિન્દા પાછળ એક રાજકુમારનો વિલાપ ———દીપક ત્રિવેદી

સોનપરિન્દા પાછળ એક રાજકુમારનો વિલાપ ———દીપક ત્રિવેદી

સોનહિંડોળે હીંચકતો કોઈ સોળ વરસનો કુંવર બોલે …સોનપરિન્દા સોનપરિન્દા સોનપરિન્દા નામ ….
રાજા – રાણી સમજાવે કે સોનપરિન્દા નામે પંખી ઊડી ગયું આકાશ … કુંવર પાછું ક્યાંથી આવે ?

કુંવર સમજે – બમજે કંઈ નહીં હાથ ઉછાળે પગ ઉછાળે સપનામાં પણ સોનપરિન્દા લાવે !!
બાગ – બગીચા ફૂલ – ઝાડ – ફુવારાં વચ્ચે કુંવર બોલે …સોનપરિન્દા સોનપરિન્દા સોનપરિન્દા ગામ …
સોળ વરસનો કુંવર બોલે સોનપરિન્દા નામ …!

ઢંઢેરો પિટાયો ગામે – ગામ શેરીએ શેરી આવો …. રાજકુંવરનો સબ્બાકો ઉતારો !
સુપડાધારે વરસીને સુકલકડી થતા વાદળને રે ……….એક ઝાટકે ઠારો !
ગામ – નદી કે ઝરણાંકાંઠે, પાદર – વડલે, કુંવર બોલે ….સોનપરિન્દા …સોનપરિન્દા …સોનપરિન્દા નામ ?
સોળવરસનો કુંવર બોલે સોનપરિન્દા નામ !

સોનહિંડોળે હીંચકતો કોઈ સોળ વરસનો કુંવર બોલે ….. .સોનપરિન્દા સોનપરિન્દા સોનપરિન્દા નામ …
સોળ વરસનો કુંવર બોલે સોનપરિન્દા નામ …

————–દીપક ત્રિવેદી

પીઠી ચોળી નજર ————દીપક ત્રિવેદી

પીઠી ચોળી નજર ————દીપક ત્રિવેદી

એક છોકરી મારી સામે જોતી જોતી ગલગોટો થઇ જાતી ….. હરખે , ગલગોટો થઇ જાતી !
ચશ્માને વીંધીને જોયું મેં તો તિર્યક ફરફોલો થઇ જાતી …… બોલો ફરફોલો થઇ જાતી !

તૂટક – તૂટક નજરું સાંધી આંગળિયું ફેરવતી ……તો યે નજરું તૂટી જાતી !!
અડખેપડખેના માણસનું ધ્યાન જરા ચૂકવતી ……. તો યે કૂંપળ ફૂટી જાતી !!

મલ્લકનું અંધારું અડધી આંખે આંજી જોતી ….ચાંદલિયો થઇ જાતી ….આભે ,ચાંદલિયો થઇ જાતી .

અધમણ આંજણ આંખે ઝીલી તબડક ….. તબડક જોતો …. આડો તડકો અંતરિયાળ !
હાથે ઢોલ – નગારાં વાગે …. શ્વાસે શરણાયું સંઘરતી ….. આડો તડકો અંતરયાળ !

ઝીલણ અનરધારી આંખ ધ્રુસક રોતી રોતી …પરપોટો થઇ જાતી …ચોખ્ખો , પરપોટો થઇ જાતી,
એક છોકરી મારી સામે જોતી જોતી ગલગોટો થઇ જાતી ….. હરખે , ગલગોટો થઇ જાતી !

—————દીપક ત્રિવેદી

સોનાનાં વનમાળી —દીપક ત્રિવેદી

(દક્ષિણનાં પદ્મનાભ -મંદિરમાંથી ખજાનો પ્રાપ્ત થયા બાદ)
સોનાનાં વનમાળી —દીપક ત્રિવેદી
આ કેવી ગોબાજાળી છે ?
છેક ભોંયરામાં સુતેલા સોનાનાં વનમાળી છે …!!
સોના- ચાંદી- હીરા- મોતી મબલક એના દ્વારે …
એની કૃપા અઢળક દ્વારો ખુલી ગયા અંધારે ….
હસી-ખુશીનાં વાદળ વરસ્યાં જાણે અમરત-ધારે…
આ દીવો છે કે થાળી છે ?
કોને અહીંયા એક ઈશારે ક્ષણને આમ ઉછાળી છે ?
આ કેવી ગોબાજાળી છે ?
છેક ભોંયરામાં સુતેલા સોનાનાં વનમાળી છે …!!
કોના ડૂસકાં થીજી ગયા ને કોને આવ્યાં આંસુ ?
સઘળું એક અનોખી પળમાં થયું હશે ચોમાસું ..
સ્થૂળ સ્વરૂપે રહી ગયું તે સોનું- ચાંદી- કાંસુ ….!
આ શું કલ્પવૃક્ષની ડાળી છે ?
આકાશેથી છેક ઉતારી ભંડાકિયામાં ઢાળી છે !
આ કેવી ગોબાજાળી છે ?
છેક ભોંયરામાં સુતેલા સોનાનાં વનમાળી છે …!!
કોઈ ગરીબો ધ્રુજી ગયા ને કોઈ મરણ-ને-શરણ ..
કંઈ કેટલાં સપનાઓનાં થઇ ગયા અપહરણ …
કૈક નવોઢાની પ્રતીક્ષા થીજી ગઈ એ ક્ષણ …
કો` જાદુઈ-પરી વીંટાળી છે ?
ખુલે-આમ સઘળાં લોકોની ઈચ્છાને ઓગાળી છે !!
આ કેવી ગોબાજાળી છે ?
છેક ભોંયરામાં સુતેલા સોનાનાં વનમાળી છે …!!
—-દીપક ત્રિવેદી

કોણ ? ———–દીપક ત્રિવેદી

કોણ ? ———–દીપક ત્રિવેદી

ઓચિંતા જળધોધ મહીંથી કો ‘ ક તર્જની ઝાલે ……..
આજે કોણ અડાબીડ ઊભું કોઈ નહોતું કાલે …….

કોઈ કહે ક મૌનપ્રભાવક કોઈ કહે કે સોહમ
ભીતરમાં મલકાતું ગાજે એ જ રહ્યું જળદોહમ

પદ્મચક્ર હાથોમાં ઝળહળ પુંજ મરકતું ભાલે
ઓચિંતા જળધોધ મહીંથી કો ‘ ક તર્જની ઝાલે !

મર્મરતા પર્ણોમાં ઝાંકે પુદગલવંતી જાળી
કિંચિત રોમેરોમ મહીંથી કમળપાંદડી ભાળી

શબ્દ સરીખો રંગ અચાનક કોણ ધરે કરતાલે?
ઓચિંતા જળધોધ મહીંથી કો ‘ ક તર્જની ઝાલે !

————-દીપક ત્રિવેદી

આગમન —————-દીપક ત્રિવેદી

આગમન —————-દીપક ત્રિવેદી

નીલકમલ પત્રોની ધારે
તડકો બેઠો એક સવારે

ઝબકે આખી પ્રશ્નકુંડળી
કોઈ કવિતા – દત્ત વાદળી

હિમ – પર્વતોના સથવારે
તડકો બેઠો એક સવારે

ઝળહળ આખી અલકાનગરી
મત્ત – પવન ઉડાડે ડમરી !

કોણ નદી ગંગા ઉતારે ?
નીલકમલ પત્રોની ધારે

———–દીપક ત્રિવેદી

શ્રાવણ ઝરમરિયો --------દીપક ત્રિવેદી

શ્રાવણ ઝરમરિયો --------દીપક ત્રિવેદી

વાદળમાં ઝૂલે રે શ્રાવણ ઝરમરિયો !
ક્યાં જઈને ખૂલે રે શ્રાવણ ઝરમરિયો !

જાય અરીસામાંથી ઠેકી સોંસરવો--
કઈ પળો ભૂલે રે શ્રાવણ ઝરમરિયો !

વાત હજુયે ચોક-વચાળે ઘુમરાતી
નિજ- હળમાં શું.... લે રે શ્રાવણ ઝરમરિયો !

કોઈ પરીની પાંખ ઉપરનાં સુસવાટા
વા' જળમાં ફૂલે રે શ્રાવણ ઝરમરિયો !

એક નદીનાં કોતર- કાંઠે ઓચિંતો ---
ખળખળમાં છુ ...લે રે શ્રાવણ ઝરમરિયો !

---દીપક ત્રિવેદી

કંકુના કાગળ ……….દીપક ત્રિવેદી

કંકુના કાગળ ……….દીપક ત્રિવેદી 

કંકુના કાગળ આવ્યા .. !
ઝળહળ દીવા રે પ્રગટાવ્યા …!

ઝૂલી હથેળી ઝૂલી લસરક .. ગલગોટાને બાંધી ..!
ખુલી આંખ અધખુલ્લી રે ..તડકામાં આવી આંધી ..!

શ્રાવણ ઝરમરિયા વરસાવ્યા …!
કંકુના કાગળ આવ્યા ….!

દરિયે અધવચ્ચ મુકો રે …અંધારા હાંફળ-ફાંફળ ..!
મેઘધનુનો ભુક્કો રે ..કંકુના વાદળ આગળ ..!

ચંદરવે રંગ ઉછળ્યા ….!
કંકુના કાગળ આવ્યા …..!

દીપક ત્રિવેદી———

સોળ વરસનાં  છોકરાનું  ગીત --------  દીપક ત્રિવેદી 

સોળ વરસનાં ખેતર વચ્ચે દાતરડું ઝીકયું રે ઘચ્ચક ...પરીયું ફૂટી નીકળી ... 
ફચ્ચ ... ઝાટકો માર્યો રાતોચોળ ... હળફ ... છોકરિયું ફૂટી નીકળી ...

                                                                   ઘચ્ચક ...પરીયું ફૂટી નીકળી ...!    

લીલ્લમ ખેતર વચ્ચે સીધોસટ થઇ ઉભો તો લાગ્યો તરગાળાનો  વેશ ...!

શેઢે   વડલો   કરતો   ઝુલમઝૂલ ...કહેતો   નથી   વેશ  લવલેશ ...!!!

વળી એમ   થાતું  કે આંખે  છરકા મારી ...ધમાકધમ પાંદળિયું  ફૂટી નીકળી ...

                                                                  ઘચ્ચક ...પરીયું ફૂટી નીકળી ...!

તડકો સોંસરવો નીકળીને સોનેરી થઇ જાતો ...બહાપો સોનેરી થઇ જાતો  ...

પવન કાનમાં ગુસપુસ ગુસપુસ હું લહેરી થઇ જાતો ...હું લહેરી થઇ જાતો ...

સોળ વરસની ઘુઘરિયુંમાં ઝનનન ઠેસ  ... ધનક ઝાંઝરિયું ફૂટી નીકળી ...

                                                                 ઘચ્ચક ...પરીયું ફૂટી નીકળી ...!    

 --------  દીપક ત્રિવેદી 

ધત્ ત્તેરીકી !!—–દીપક ત્રિવેદી

ધત્ ત્તેરીકી !!—–દીપક ત્રિવેદી


શ્વાસ ધડોધડ ફૂટે ઝરમર ધત્ ત્તેરીકી !!
અંIખ અડોઅડ મેઘાડમ્મર ધત્ ત્તેરીકી!!
પીળાં પચરક કેશુડાના છાંટા છલ્લક-
અલ્લપ-ઝલ્લપ ટહુકે અંબર ધત્ ત્તેરીકી!!
ટેકરીઓના ઘાસ પાંદડા પીધા તકધીન્-
આવે કાચે કાચાં તમ્મર ધત્ ત્તેરીકી !!
પીધાં રે ગુલમહોર ટેરવે અડિયો-દડિયો-
ઊંધ-મુંધ છાતી ને કમ્મર ધત્ ત્તેરીકી !!
પાંચ વાંભની પૂતળિયુંમાં જંતર મંતર-
છલકે સરવર કૂવા ભમ્મર ધત્ ત્તેરીકી !!


—દીપક ત્રિવેદી

ઢોલ ઢબૂકે—-દીપક ત્રિવેદી

ઢોલ ઢબૂકે—-દીપક ત્રિવેદી

ઢોલ ઢબૂકે હસ્ત-કમળમાં !
જીવ ઝબૂકે એક વમળમાં !

પડઘા પૂછે જળની રાણી–
શું છે એવું નાભિ-જળમાં ?

તરવાની છે મસ્ત સપાટી
શું લેવાનું ઊંડા તળમાં ?

ઝેર કટોરા પચી જવાનાં -
કાં મોહી જા અમૃતફળમાં ?

કલ્કિને તું નહીં જન્માવે -
સમય ભળી જા તું વ્યન્ઢળમાં !!

—–દીપક ત્રિવેદી

પરમ પામવું —-દીપક ત્રિવેદી

પરમ પામવું —-દીપક ત્રિવેદી

પરમ પામવું ક્યાં છે સહેલું ?
વધાવ જે કંઈ આવે વહેલું !!

ઉઠાવ એને તીર કરીને -
તારામાં જે વસી રહેલું !!

તારો છાયો તારા માથે
સિદ્ધ ફકીરે એમ કહેલું !!

તો તો તારું કામ થઇ ગ્યું
મન બને જો સમજણઘેલું

અંતરદીપ જો પ્રગટી જાશે
પછી નથી કંઈ છેલ્લું-પહેલું !!

—-દીપક ત્રિવેદી

તો વાત કર મને ——–દીપક ત્રિવેદી

તો વાત કર મને ——–દીપક ત્રિવેદી

મનમાં થયો વિચાર તો વાત કર મને
હોય જો આકાર તો વાત કર મને
ઘૂમે અલગ અલગ વિરાટ સૂક્ષ્મતમ–
પામી શકાય પાર તો વાત કર મને
હોય પણ ખરું ન હોય પણ ખરું –
સમજાય ફેરફાર તો વાત કર મને
વિશ્વ ની કથા કે પીંડની વ્યથા –
દેખાય જો આધાર તો વાત કર મને
મૌન કબીરા -નરસિંહ કે વિઠલ્લા –
ગાય જો મલ્હાર તો વાત કર મને !!!
———દીપક ત્રિવેદી

બેઠા ત્યાં સમાધિ છે —–દીપક ત્રિવેદી

બેઠા ત્યાં સમાધિ છે —–દીપક ત્રિવેદી

બેઠા ત્યાં સમાધિ છે
જાગ્યાં તો ઉપાધિ છે
જીવનનાં કોઈ ખૂણેથી
અમને પ્રજ્ઞા લાધી છે
સુખના ધોરી મારગ પર
અશાંતિ પણ આધી છે
ઉલટાવી જો લાગણિયું
ક્યાં છૂટી ક્યાં બાધી છે
માગ નહિ આ મસ્તીને
મહા-મહેનતે સાધી છે

——દીપક ત્રિવેદી

પર્ણ-પર્ણમાં ઝીંકાતો વરસાદ—-દીપક ત્રિવેદી

પર્ણ-પર્ણમાં ઝીંકાતો વરસાદ—-દીપક ત્રિવેદી 

પર્ણ-પર્ણમાં ઝીંકાતો વરસાદ

તમે મુકતા જાતા એમાં થોડેરો ઉન્માદ !!

વાદળછાયાં ગામ-શેરિયું અને મલકતાં ચહેરાનો રઘવાટ

પવન પંડમાં પહેરી ઉભા પછી ઉંબરે ઝૂલે હિંડોળા-ખાંટ…

ઝીર્ણ-શીર્ણ તરસ્યુંને કરતો બાદ

નહીં ઉઘડતા ફૂલોમાં પણ કલરવભીનો વાદ…

ઘૂંટી ઘૂંટીને પાઈ દીધા છે અલકમલકનાં અજવાળાં બેફામ

જાણે માથે હાથ મુકવા અહીં આવતા દોડીને ઘનશ્યામ !!

અંગ-અંગની તૂટી ગઈ મરજાદ

પછી મહેકતાં ફૂલોમાં પણ પડઘાઓ દે સાદ !!

———દીપક ત્રિવેદી

પડઘો સવા લાખનો———-દીપક ત્રિવેદી

પડઘો સવા લાખનો———-દીપક ત્રિવેદી 

 

એક રે ગગન ગુંજતો પડઘો સવા લાખનો ….કોઈ ઝીલો રે…. કોઈ ઝીલો …!!

વાયરે પુગી આવતો તડકો સવા લાખનો  ….કોઈ ઝીલો રે…. કોઈ ઝીલો …!!

 

પગમાં પવન પાવડી પહેરી લીધી આશમાં …ક્યાંક ઊડું રે ….ક્યાંક ઊડું ….!

મન તો સોનલ-માછલી  તરવા લાગી શ્વાસમાં.. કેમ બુડું રે….. કેમ બુડું …? 

 

અમથો પડી ભાગતો ફડકો   સવા લાખનો ….કોઈ ઝીલો રે…. કોઈ ઝીલો …!!

એક રે ગગન ગુંજતો પડઘો સવા લાખનો ….કોઈ ઝીલો રે…. કોઈ ઝીલો …!!

 

સપનાનું જળ શામળું  ગઢમાં ઘૂસી આવતું …છલછલે    રે…. છલછલે    !

છલનાનું છળ પાતળું પગલાં ભૂંસી નાખતું …છલછલે    રે…. છલછલે    !

 

કોઈના માટે ઝૂરતો મનખો સવા લાખનો ….કોઈ ઝીલો રે…. કોઈ ઝીલો …!!

એક રે ગગન ગુંજતો પડઘો સવા, લાખનો ….કોઈ ઝીલો રે…. કોઈ ઝીલો …!!

 

નદી કિનારે જાવું સે………………દીપક ત્રિવેદી

નદી કિનારે  જાવું સે………………દીપક ત્રિવેદી 

 

નદી કિનારે  જાવું સે…ને .. ખળખળ થાવું સે… શુકનવંતા ગીત અરધે રસ્તે રે…  નદી કિનારે …!!

પડઘામાં પથરાવું સે… ને..ખોબામાં ઝીલાવું સે …મધમીઠું સંગીત અરધે રસ્તે રે…  નદી કિનારે …!!

ઝાકળનાં દરવાજા સે …ને …માલીકોરે રાજા સે …ઊઘડે આખી પ્રીત અરધે રસ્તે રે…નદી કિનારે …!!

તળિયે જઈને નાવું સે …ને…ભીતરમાં ભીંજાવું સે … આ તે કેવી રીત અરધે રસ્તે રે…નદી કિનારે …!!

ઢોલ,નગારાં,પડઘમ સે… ને…શરણાયુંમાં વાલમ સે …વગડે આખું ચિત્ત અરધે રસ્તે રે…નદી કિનારે …!!

મારી માથે દરિયો સે… ને…દરિયા પર સાંવરિયો સે …સાંવરિયો નવનીત અરધે રસ્તે રે…નદી કિનારે …!!

નદી કિનારે  જાવું સે…ને .. ખળખળ થાવું સે… શુકનવંતા ગીત અરધે રસ્તે રે…  નદી કિનારે …!!

 

—————દીપક ત્રિવેદી 

ગઝલ મારી મને ગમશે —-દીપક ત્રિવેદી

ગઝલ મારી મને ગમશે —-દીપક ત્રિવેદી

ગઝલ મારી મને ગમશે અને પંપાળવી ગમશે
ક્ષણોને શબ્દથી ભરચક કરી શણગારવી ગમશે

ઢળેલી રાતને પાછી તમે જો વાળવા ચાહો -
વીતેલી યાદને જળમાં ઝબોળી નાખવી ગમશે

ફૂલોમાં હોય છે તે ક્યાંય પણ હોતી નથી મિત્રો-
ભલા એ મહેંક મારામાં બધીયે ઢાળવી ગમશે !!

ઉઘાડે દિલ નહાતા હોય છે સપના અમારામાં –
ખરેખર એ જ કારણથી નદીને વાળવી ગમશે !

અમસ્તું ક્યાં મળે છે દીપને અજવાળવા જેવું
મળે જો મોત તો છેલ્લે કબર અજવાળવી ગમશે..!!

——-દીપક ત્રિવેદી