શ્રાવણ ઝરમરિયો --------દીપક ત્રિવેદી

શ્રાવણ ઝરમરિયો --------દીપક ત્રિવેદી

વાદળમાં ઝૂલે રે શ્રાવણ ઝરમરિયો !
ક્યાં જઈને ખૂલે રે શ્રાવણ ઝરમરિયો !

જાય અરીસામાંથી ઠેકી સોંસરવો--
કઈ પળો ભૂલે રે શ્રાવણ ઝરમરિયો !

વાત હજુયે ચોક-વચાળે ઘુમરાતી
નિજ- હળમાં શું.... લે રે શ્રાવણ ઝરમરિયો !

કોઈ પરીની પાંખ ઉપરનાં સુસવાટા
વા' જળમાં ફૂલે રે શ્રાવણ ઝરમરિયો !

એક નદીનાં કોતર- કાંઠે ઓચિંતો ---
ખળખળમાં છુ ...લે રે શ્રાવણ ઝરમરિયો !

---દીપક ત્રિવેદી

કંકુના કાગળ ……….દીપક ત્રિવેદી

કંકુના કાગળ ……….દીપક ત્રિવેદી 

કંકુના કાગળ આવ્યા .. !
ઝળહળ દીવા રે પ્રગટાવ્યા …!

ઝૂલી હથેળી ઝૂલી લસરક .. ગલગોટાને બાંધી ..!
ખુલી આંખ અધખુલ્લી રે ..તડકામાં આવી આંધી ..!

શ્રાવણ ઝરમરિયા વરસાવ્યા …!
કંકુના કાગળ આવ્યા ….!

દરિયે અધવચ્ચ મુકો રે …અંધારા હાંફળ-ફાંફળ ..!
મેઘધનુનો ભુક્કો રે ..કંકુના વાદળ આગળ ..!

ચંદરવે રંગ ઉછળ્યા ….!
કંકુના કાગળ આવ્યા …..!

દીપક ત્રિવેદી———

સોળ વરસનાં  છોકરાનું  ગીત --------  દીપક ત્રિવેદી 

સોળ વરસનાં ખેતર વચ્ચે દાતરડું ઝીકયું રે ઘચ્ચક ...પરીયું ફૂટી નીકળી ... 
ફચ્ચ ... ઝાટકો માર્યો રાતોચોળ ... હળફ ... છોકરિયું ફૂટી નીકળી ...

                                                                   ઘચ્ચક ...પરીયું ફૂટી નીકળી ...!    

લીલ્લમ ખેતર વચ્ચે સીધોસટ થઇ ઉભો તો લાગ્યો તરગાળાનો  વેશ ...!

શેઢે   વડલો   કરતો   ઝુલમઝૂલ ...કહેતો   નથી   વેશ  લવલેશ ...!!!

વળી એમ   થાતું  કે આંખે  છરકા મારી ...ધમાકધમ પાંદળિયું  ફૂટી નીકળી ...

                                                                  ઘચ્ચક ...પરીયું ફૂટી નીકળી ...!

તડકો સોંસરવો નીકળીને સોનેરી થઇ જાતો ...બહાપો સોનેરી થઇ જાતો  ...

પવન કાનમાં ગુસપુસ ગુસપુસ હું લહેરી થઇ જાતો ...હું લહેરી થઇ જાતો ...

સોળ વરસની ઘુઘરિયુંમાં ઝનનન ઠેસ  ... ધનક ઝાંઝરિયું ફૂટી નીકળી ...

                                                                 ઘચ્ચક ...પરીયું ફૂટી નીકળી ...!    

 --------  દીપક ત્રિવેદી 

ધત્ ત્તેરીકી !!—–દીપક ત્રિવેદી

ધત્ ત્તેરીકી !!—–દીપક ત્રિવેદી


શ્વાસ ધડોધડ ફૂટે ઝરમર ધત્ ત્તેરીકી !!
અંIખ અડોઅડ મેઘાડમ્મર ધત્ ત્તેરીકી!!
પીળાં પચરક કેશુડાના છાંટા છલ્લક-
અલ્લપ-ઝલ્લપ ટહુકે અંબર ધત્ ત્તેરીકી!!
ટેકરીઓના ઘાસ પાંદડા પીધા તકધીન્-
આવે કાચે કાચાં તમ્મર ધત્ ત્તેરીકી !!
પીધાં રે ગુલમહોર ટેરવે અડિયો-દડિયો-
ઊંધ-મુંધ છાતી ને કમ્મર ધત્ ત્તેરીકી !!
પાંચ વાંભની પૂતળિયુંમાં જંતર મંતર-
છલકે સરવર કૂવા ભમ્મર ધત્ ત્તેરીકી !!


—દીપક ત્રિવેદી

ઢોલ ઢબૂકે—-દીપક ત્રિવેદી

ઢોલ ઢબૂકે—-દીપક ત્રિવેદી

ઢોલ ઢબૂકે હસ્ત-કમળમાં !
જીવ ઝબૂકે એક વમળમાં !

પડઘા પૂછે જળની રાણી–
શું છે એવું નાભિ-જળમાં ?

તરવાની છે મસ્ત સપાટી
શું લેવાનું ઊંડા તળમાં ?

ઝેર કટોરા પચી જવાનાં -
કાં મોહી જા અમૃતફળમાં ?

કલ્કિને તું નહીં જન્માવે -
સમય ભળી જા તું વ્યન્ઢળમાં !!

—–દીપક ત્રિવેદી

પરમ પામવું —-દીપક ત્રિવેદી

પરમ પામવું —-દીપક ત્રિવેદી

પરમ પામવું ક્યાં છે સહેલું ?
વધાવ જે કંઈ આવે વહેલું !!

ઉઠાવ એને તીર કરીને -
તારામાં જે વસી રહેલું !!

તારો છાયો તારા માથે
સિદ્ધ ફકીરે એમ કહેલું !!

તો તો તારું કામ થઇ ગ્યું
મન બને જો સમજણઘેલું

અંતરદીપ જો પ્રગટી જાશે
પછી નથી કંઈ છેલ્લું-પહેલું !!

—-દીપક ત્રિવેદી

તો વાત કર મને ——–દીપક ત્રિવેદી

તો વાત કર મને ——–દીપક ત્રિવેદી

મનમાં થયો વિચાર તો વાત કર મને
હોય જો આકાર તો વાત કર મને
ઘૂમે અલગ અલગ વિરાટ સૂક્ષ્મતમ–
પામી શકાય પાર તો વાત કર મને
હોય પણ ખરું ન હોય પણ ખરું –
સમજાય ફેરફાર તો વાત કર મને
વિશ્વ ની કથા કે પીંડની વ્યથા –
દેખાય જો આધાર તો વાત કર મને
મૌન કબીરા -નરસિંહ કે વિઠલ્લા –
ગાય જો મલ્હાર તો વાત કર મને !!!
———દીપક ત્રિવેદી

બેઠા ત્યાં સમાધિ છે —–દીપક ત્રિવેદી

બેઠા ત્યાં સમાધિ છે —–દીપક ત્રિવેદી

બેઠા ત્યાં સમાધિ છે
જાગ્યાં તો ઉપાધિ છે
જીવનનાં કોઈ ખૂણેથી
અમને પ્રજ્ઞા લાધી છે
સુખના ધોરી મારગ પર
અશાંતિ પણ આધી છે
ઉલટાવી જો લાગણિયું
ક્યાં છૂટી ક્યાં બાધી છે
માગ નહિ આ મસ્તીને
મહા-મહેનતે સાધી છે

——દીપક ત્રિવેદી

પર્ણ-પર્ણમાં ઝીંકાતો વરસાદ—-દીપક ત્રિવેદી

પર્ણ-પર્ણમાં ઝીંકાતો વરસાદ—-દીપક ત્રિવેદી 

પર્ણ-પર્ણમાં ઝીંકાતો વરસાદ

તમે મુકતા જાતા એમાં થોડેરો ઉન્માદ !!

વાદળછાયાં ગામ-શેરિયું અને મલકતાં ચહેરાનો રઘવાટ

પવન પંડમાં પહેરી ઉભા પછી ઉંબરે ઝૂલે હિંડોળા-ખાંટ…

ઝીર્ણ-શીર્ણ તરસ્યુંને કરતો બાદ

નહીં ઉઘડતા ફૂલોમાં પણ કલરવભીનો વાદ…

ઘૂંટી ઘૂંટીને પાઈ દીધા છે અલકમલકનાં અજવાળાં બેફામ

જાણે માથે હાથ મુકવા અહીં આવતા દોડીને ઘનશ્યામ !!

અંગ-અંગની તૂટી ગઈ મરજાદ

પછી મહેકતાં ફૂલોમાં પણ પડઘાઓ દે સાદ !!

———દીપક ત્રિવેદી

પડઘો સવા લાખનો———-દીપક ત્રિવેદી

પડઘો સવા લાખનો———-દીપક ત્રિવેદી 

 

એક રે ગગન ગુંજતો પડઘો સવા લાખનો ….કોઈ ઝીલો રે…. કોઈ ઝીલો …!!

વાયરે પુગી આવતો તડકો સવા લાખનો  ….કોઈ ઝીલો રે…. કોઈ ઝીલો …!!

 

પગમાં પવન પાવડી પહેરી લીધી આશમાં …ક્યાંક ઊડું રે ….ક્યાંક ઊડું ….!

મન તો સોનલ-માછલી  તરવા લાગી શ્વાસમાં.. કેમ બુડું રે….. કેમ બુડું …? 

 

અમથો પડી ભાગતો ફડકો   સવા લાખનો ….કોઈ ઝીલો રે…. કોઈ ઝીલો …!!

એક રે ગગન ગુંજતો પડઘો સવા લાખનો ….કોઈ ઝીલો રે…. કોઈ ઝીલો …!!

 

સપનાનું જળ શામળું  ગઢમાં ઘૂસી આવતું …છલછલે    રે…. છલછલે    !

છલનાનું છળ પાતળું પગલાં ભૂંસી નાખતું …છલછલે    રે…. છલછલે    !

 

કોઈના માટે ઝૂરતો મનખો સવા લાખનો ….કોઈ ઝીલો રે…. કોઈ ઝીલો …!!

એક રે ગગન ગુંજતો પડઘો સવા, લાખનો ….કોઈ ઝીલો રે…. કોઈ ઝીલો …!!

 

નદી કિનારે જાવું સે………………દીપક ત્રિવેદી

નદી કિનારે  જાવું સે………………દીપક ત્રિવેદી 

 

નદી કિનારે  જાવું સે…ને .. ખળખળ થાવું સે… શુકનવંતા ગીત અરધે રસ્તે રે…  નદી કિનારે …!!

પડઘામાં પથરાવું સે… ને..ખોબામાં ઝીલાવું સે …મધમીઠું સંગીત અરધે રસ્તે રે…  નદી કિનારે …!!

ઝાકળનાં દરવાજા સે …ને …માલીકોરે રાજા સે …ઊઘડે આખી પ્રીત અરધે રસ્તે રે…નદી કિનારે …!!

તળિયે જઈને નાવું સે …ને…ભીતરમાં ભીંજાવું સે … આ તે કેવી રીત અરધે રસ્તે રે…નદી કિનારે …!!

ઢોલ,નગારાં,પડઘમ સે… ને…શરણાયુંમાં વાલમ સે …વગડે આખું ચિત્ત અરધે રસ્તે રે…નદી કિનારે …!!

મારી માથે દરિયો સે… ને…દરિયા પર સાંવરિયો સે …સાંવરિયો નવનીત અરધે રસ્તે રે…નદી કિનારે …!!

નદી કિનારે  જાવું સે…ને .. ખળખળ થાવું સે… શુકનવંતા ગીત અરધે રસ્તે રે…  નદી કિનારે …!!

 

—————દીપક ત્રિવેદી 

ગઝલ મારી મને ગમશે —-દીપક ત્રિવેદી

ગઝલ મારી મને ગમશે —-દીપક ત્રિવેદી

ગઝલ મારી મને ગમશે અને પંપાળવી ગમશે
ક્ષણોને શબ્દથી ભરચક કરી શણગારવી ગમશે

ઢળેલી રાતને પાછી તમે જો વાળવા ચાહો -
વીતેલી યાદને જળમાં ઝબોળી નાખવી ગમશે

ફૂલોમાં હોય છે તે ક્યાંય પણ હોતી નથી મિત્રો-
ભલા એ મહેંક મારામાં બધીયે ઢાળવી ગમશે !!

ઉઘાડે દિલ નહાતા હોય છે સપના અમારામાં –
ખરેખર એ જ કારણથી નદીને વાળવી ગમશે !

અમસ્તું ક્યાં મળે છે દીપને અજવાળવા જેવું
મળે જો મોત તો છેલ્લે કબર અજવાળવી ગમશે..!!

——-દીપક ત્રિવેદી

આંખ અડાબીડ દરિયો———-દીપક ત્રિવેદી

આંખ અડાબીડ દરિયો———-દીપક ત્રિવેદી
આંખ અડાબીડ દરિયો છે ને હું છું …છલોછલ… છલ… છલ… છલ… !
આ મારામાં સાંવરિયો છે ને હું છું …છલોછલ… છલ… છલ… છલ… !
આ રણઝણતા ઝાંઝરીયા ….
હેય અમે શ્વાસ માં ભરિયા –
ઈ મન સાગરમાં ભરિયો છે ને હું છું …છલોછલ… છલ… છલ… છલ… !
આંખ અડાબીડ દરિયો છે ને હું છું …છલોછલ… છલ… છલ… છલ… !
જો ગમે એક-બે ઠુમરી….
ઈ બને અષાઢી ઘુમરી….
ઈ પર્ણોમાં મરમરિયો છે ને હું છું …છલોછલ… છલ… છલ… છલ… !
આંખ અડાબીડ દરિયો છે ને હું છું …છલોછલ… છલ… છલ… છલ… !
ઈ મેઘ ધનુષી છાંયો ….
ઉર આકાશે પથરાયો ….
ઈ પડઘા માં પાથરિયો છે ને હું છું …છલોછલ… છલ… છલ… છલ… !
આંખ અડાબીડ દરિયો છે ને હું છું …છલોછલ… છલ… છલ… છલ… !
——-દીપક ત્રિવેદી

શ્વાસ મધ્યેથી ચાલો —–દીપક ત્રિવેદી

શ્વાસ મધ્યેથી ચાલો —–દીપક ત્રિવેદી

ઉચાળા ભરો શ્વાસ-મધ્યેથી ચાલો !
અરે !ઓ પવન ! દ્વાર વચ્ચેથી ચાલો !
મુલાયમ સમયને કવચમાં વીંટાળી -
તમે જંગલો પર્ણરન્ધ્રેથી ચાલો !!
ઉધાડી જુઓ શ્વેત-અશ્વેત પત્રો –
કંઈ ના મળે કૃષ્ણ-પક્ષેથી ચાલો.
ઢાળો મધ્યરણમાં, મળો રક્તકણમાં–
ભીના થયાં ભગ્નવસ્ત્રેથી ચાલો !!
સોહમ ધ્વનિ ઘૂઘવે પંચ-પ્રાણે –
હવે નીલવર્ણ વિષચક્રેથી ચાલો !!

—–દીપક ત્રિવેદી

ગધના શું કરવું છે ?———-દીપક ત્રિવેદી

ગધના શું કરવું છે ?———-દીપક ત્રિવેદી

પકડી તે તો હઠ ગધના શું કરવું છે ?
નીકળી હકડેઠઠ્ઠ ગધના શું કરવું છે ?
તું તો અક્કલહીણો કાંઈ બોલ હવે તો -
ઢાળીને બાજઠ ગધના શું કરવું છે ?
તે કીધું તો બાંધી લીધો રેત લઇને
નદીકિનારે મઠ ગધના શું કરવું છે ?
દિવસે તારું મૌન રાતના ખુલમખુલ્લા
સપના આવે લઠ્ઠ ગધના શું કરવું છે ?
સમ ખાવાયે અહિયાં ઉગ્યું નથી તણખલું
જીવતર સુક્કુંભઠ્ઠ ગધના શું કરવું છે ?

—-દીપક ત્રિવેદી

એક સહિયારી રાતનું ગીત ——————————દીપક ત્રિવેદી

એક સહિયારી રાતનું ગીત ——————————દીપક ત્રિવેદી

અંબોડો છોડયોને ત્યાં તો વાંભવાંભના ચોટલિયેથી સરી પડી’તી ભાત-ભાતનાં ચટકાંવાળી કાળી કાળી રાત… હું ભૂલું ક્યાંથી વાત … …એ કાયમ મારી સાથ….!

અડધાં ભીનાં અડધાં કોરાં ચોટલિયેથી ખરી પડી’તી જાતજાતનાં ફૂલ ગૂંથેલી પહેલીવહેલી વેણીની સોગાત… હું ભૂલું ક્યાંથી વાત … …એ કાયમ મારી સાથ….!
ડાળ ઉપર બે ભોળી ચકલી તારી-મારી યાદોને પડખામાં લેતી વસંતની પાંખો ફફડાવી થાક કાઢવા બેઠી …ભીની પાંખે ઉડવા જાતી ……આંખો રાતી-માતી……!!
ઓલીકોરે કાળાધબ્બ પડછાયામાંથી સનનન કરતું તીર વછૂટી પાંખે વળગ્યું ત્યાં તો ચકલી ચી-ચી કરતી હેઠી ….બેઠી થવાને ઊંચકાતી…..પાંપણ ભીની થાતી…!!

રીસ અચાનક ઝબકી બેઠી કમળપાંદડીને શરમાવે એવા તારા વદનકમળ પર ઉપસી જાણે મહેંદીલા હાથેથી ભાત … હું ભૂલું ક્યાંથી વાત ..એ કાયમ મારી સાથ…!

ચણોઠડીને આંટે એવીલાલરંગની હથેળિયુંમાં ભીંજાતો‘તો તારો-મારો સહિયારો રૂમાલ…..હશે તને એ યાદ…. વાદળનો ઝરમર વરસાદ …  પાંદળિયુંમાં થાતો નાદ, હશે તને એ યાદ…..!!
અંબોડો ધ્રૂજવે એવી ટાઢ પડી’તી એક રાતમાં ત્યારે આપણ બેઠાં ઓઢી શાલ …. હશે તને એ યાદ…. વાદળનો ઝરમર વરસાદ … પાંદળિયુંમાં થાતો નાદ, હશે તને એ યાદ…..!!

કલરવ ભીનાં પંખીડાઓ માળા છોડી લીલોતરીનાં ઘરમાં જતાં ગુલાબી પાંખડીએથી  નહાતું પરભાત ……હું  ભૂલું ક્યાંથી વાત … …એ કાયમ મારી સાથ….!

અંબોડો છોડયોને ત્યાં તો વાંભવાંભના ચોટલિયેથી સરી પડી’તી ભાતભાતના ચટકાંવાળી કાળીકાળી રાત… હું ભૂલું ક્યાંથી વાત … …એ કાયમ મારી સાથ….!

——————————દીપક ત્રિવેદી

પાગલ ને હોય નહીં જાત———દીપક ત્રિવેદી

પાગલ ને હોય નહીં જાત———દીપક ત્રિવેદી

પાગલને હોય નહીં જાત

હોય છે એ મૂળથી કજાત

ફૂલોમાં  છાંટે   છે   અત્તરનાં  ફુવારા પીંછું   કબુતરનું   પહેરે !

પથ્થરનાં પાંચીકા જોઈ ને અચાનક રસ્તામાં સ્મિતને જ વેરે !!

લાગે ના  કોઈ  દિ ‘  આઘાત

પાગલને હોય નહીં જાત !!

જાતને જે ભૂલે છે , ભૂલે છે દુઃખોનાં   દરિયાઓ આખાં ને આખાં;

દીવાના ચક્ષુથી તેને દેખાયા જે ,રસ્તાઓ સાવ હતા ઝાંખા !!

હોય નહીં પોતાની નાત  ;

પાગલને હોય નહીં જાત

લોકો તો એમ કહે કવિઓ પણ પાગલ છે, પાગલ છે આખું ખાનદાન !

દિવસ કે રાત ગણકારે  નહીં  બસ,  કવિતામાં  બાંધે  મકાન !!!

છાની નૈ એની કોઈ વાત !!

પાગલ ને હોય નહીં જાત

———દીપક ત્રિવેદી

બહુ કઠીન છે————-દીપક ત્રિવેદી

બહુ કઠીન છે————-દીપક ત્રિવેદી

તડકામાં આરપાર થવું બહુ કઠીન છે
તારાથી ધારદાર થવું બહુ કઠીન છે

બહુબહુ તો મુઠ્ઠી એક ધાન દઈ શકીશ તું
કોઈ નો જીવન- આધાર થવું બહુ કઠીન છે

ઋણાનુબંધ હોય છે બધા સંબંધમાં
સંબંધનું ધરાર થવું થવું બહુ કઠીન છે

એક પળ ખુશી મળે તો ઝુમવાના સહુ
કાયમનું સદાબહાર થવું બહુ કઠીન છે

બની શકે તો કોઈનો દીપક બની જજે
આ મેઘ ,આ મલ્હાર, થવું બહુ કઠીન છે

————-દીપક ત્રિવેદી

પછી વારતા માંડું ——-દીપક ત્રિવેદી

પછી વારતા માંડું ——-દીપક ત્રિવેદી

સપનાઓનું હરિયાળું વન ઉજ્જડ ટીંબો થાય અને આંખમાં એક ઝાટકે અંધારા રેલાય પછી વારતા માંડું

મોભારાંના પાણી ધીરે ધીરે પોરો ખાય અને ઘૂઘવતાં પાંચ ભયાનક પૂર ઓસરી જાય પછી વારતા માંડું

લથબથ ડામરથી ભીંજાતો રસ્તો જો તરડાય અને પછી ખચાખચ તિરાડોમાં હિમશીલા પુરાય તો તો આવી બન્યું ,

તડાક દેતો ભીંત ઉપરનો ફોટો તૂટે હાય ! ફરીથી ઝીણી કાચ-કરચ સપનામાં ઊંડે ઊંડે જાય તો તો આવી બન્યું

ચોક વાચાળે લોઢ ઊછળતો દરિયો હેઠો જાય અને કિનારા-કાંઠા-હોડી અધમુવા વરતાય પછી વારતા માંડું

સપનાઓનું હરિયાળું વન ઉજ્જડ ટીંબો થાય અને આંખમાં એક ઝાટકે અંધારા રેલાય પછી વારતા માંડું

સાચો ખોટો દાવ દૂધિયો હોય જીવનનો તોય ડૂસકાં-ડચકાં લેતું જીવવું રે ભૈ જીવવું સાઠ દિવાળી

કો’ક દિવસ તો કલરવને તડકે મૂકીને રાત-દિવસ આંસુના પડખે જીવવું રે ભૈ જીવવું ઘટના બાળી

છડેચોક ઘટનાભીનાં સંબંધ ઊભા ચીરાય અને મરેલાં સુરજ ઉપર ઢાકો-ઢુંબો થાય પછી વારતા માંડું

સપનાઓનું હરિયાળું વન ઉજ્જડ ટીંબો થાય અને આંખમાં એક ઝાટકે અંધારા રેલાય પછી વારતા માંડું

——-દીપક ત્રિવેદી

એક લગ્ન ગીત ———દીપક ત્રિવેદી

એક લગ્ન ગીત ———દીપક ત્રિવેદી

 

પીળી દાંડીની થાંભલિયુ, લીલી પાંદડિયુંનો  છાંયો …

                                             હમચો  માણેકથંભ રોપાયો ….

                                                           વાયુ હરખપદુડો વા’યો ….

હરખે હેત હિલોળાં લેતી, પાંચેપાંચ આંગળી  બોળી  …

                                             ખોલી કંકુ વરણી ઝોળી …  

                                                          ચોખા સાથે બોળી બોળી ….

કેસરવરણો  સાફો પડદુક ,પડદુક આંખોને ઢંઢોળી …

                                             અચકો પાંપણસોતી  ચોળી …

                                                            મચકો ગલગોટે   ઝબકોળી …

છલ્લક  દરિયાઈ ઘુમ્મરિયું   મલ્લક ભમ્મરિયો પડછાયો …  

                                                  હમચો  માણેકથંભ રોપાયો ….

                                                                 વાયુ હરખપદુડો વા’યો ….

પીળી દાંડીની થાંભલિયુ, લીલી પાંદડિયુંનો  છાંયો …

                                             હમચો  માણેકથંભ રોપાયો ….

                                                           વાયુ હરખપદુડો વા’યો ….

રાતી  તલવાર્યું બંબોળ , હાલર હુલર જોડી જાન …

                                             તા થૈ  તડકો ભીનેવાન  …

                                                             તા થૈ  ફૂટે લીલું પાન … 

અધમણ ઉડે રે ગુલાલ,  અધમણ  ગીતો ઉંધેકાન્ધ …

                                             અમરો  કંકુનું તોફાન …

                                                          ડમરો ઝમ્મક-છમ્મક ગાન …

ફૂટી તકધિનાધિન પરિયું ,રંગે હાથ પછી ઝડપાયો ,

                                         હમચો  માણેકથંભ રોપાયો ….

                                                           વાયુ હરખપદુડો વા’યો ….

પીળી દાંડીની થાંભલિયુ, લીલી પાંદડિયુંનો  છાંયો …

                                             હમચો  માણેકથંભ રોપાયો ….

                                                           વાયુ હરખપદુડો વા’યો ….

 

 

—————દીપક ત્રિવેદી 

About t

ડંખે છે મને !——-દીપક ત્રિવેદી

નિજ શ્વાસોચ્છવાસ ડંખે છે મને !
આંધળો વિશ્વાસ ડંખે છે મને !
ખૂબ ઊડ્યો છું હવા લઇ પાંખમાં-
એ નું એ આકાશ ડંખે છે મને !
એક મુઠ્ઠી લઇ અને વાવી દીધો-
એ જ લીલો ચાસ ડંખે છે મને !
આંગળીમાં એ અચાનક જઈ ચડી-
વાંસની એ ફાંસ ડંખે છે મને !
ગોખલે દીવો કરું છું તે દિવસ-
બે-ઘડી અજવાસ ડંખે છે મને !
——દીપક ત્રિવેદી

–માળું કૈંક નવીન થાવાનું ———દીપક ત્રિવેદી

–માળું કૈંક નવીન થાવાનું ———દીપક ત્રિવેદી

રસ્તા વચ્ચે ધૂળ ઉડે ને ધૂળમહીં ડમરીમાં ઉડે ધુમ્મસ જેવી છોરી …માળું કૈંક નવીન થાવાનું …!!
પંદર દિ ‘ થી ધુમરા લેતો ઓરસચોરસ દરિયો પૂછે આંખ્યુંને ફંફોરી … માળું કૈંક નવીન થાવાનું …!!

ઘરમેળે ઉકલ્યું ના કાંઈ છાનુંછપનું થયું છમકલું …હચમચ રુએ આંસુ …બાંધો ધજાપતાકા બાંધો !
વીસ વરસનો ઘાવ ઉઘાડો ઉછળે મેઘધનુષી પળમાં લઇ આવો ચોમાસું …બાંધો ધજાપતાકા બાંધો !

દાતરડું લઇ સીમ ઠેકતી શોણલવંતી નગરી કાંઠે ટગમગ જોતી ગોરી …માળું કૈંક નવીન થાવાનું …!!
રસ્તા વચ્ચે ધૂળ ઉડે ને ધૂળમહીં ડમરીમાં ઉડે ધુમ્મસ જેવી છોરી …માળું કૈંક નવીન થાવાનું …!!

દીવો બળે તો અમને લાગે વણઝારુંની વણઝારું ઉમટી રે અમને જોવા ….ઘોડાપૂર થતો દેકારો …
છલકું કે ના છલકું ની ભ્રમણાની ફૂટે નદીયુ ..ફૂટે ફૂલફુલિયા તડકા….ફૂટે અલકમલક ઝંકારો …

ટોળે વળતાં અંદરખાને ઘોંચપરોણો કરતા સપનાં તાણે રેશમ દોરી …માળું કૈંક નવીન થાવાનું …!!
રસ્તા વચ્ચે ધૂળ ઉડે ને ધૂળમહીં ડમરીમાં ઉડે ધુમ્મસ જેવી છોરી …માળું કૈંક નવીન થાવાનું …!!

———દીપક ત્રિવેદી

દ્રશ્યોન્મિલિત-શબ્દાભિવ્યક્તિ——–દીપક ત્રિવેદી

દ્રશ્યોન્મિલિત-શબ્દાભિવ્યક્તિ——–દીપક ત્રિવેદી

જળમાં ડૂબી ગયા તે જળમાં રહી જવાનાં
રસ્તાઓ તો યથાવત કાંઠે વહી જવાનાં

આંબાની ડાળ હો કે આંખોમીંચામણી હો-
વડવાઇમાં લીખિતમ શૈશવ સહી જવાનાં

પથ્થરની પાંચ વેંતો ભરવા રહ્યા પ્રિયે ત્યાં-
સૌ પાળિયા કથિતમ પથ્થર રહી જવાનાં

દિગમ્બરી ક્ષણોને જો મખમલિત કરો તો-
મિથ્યા પ્રયત્ન સર્વમ દ્રશ્યો કહી જવાનાં

પગલું પડે તો ઝીલું ઝલમલ થતા કિનારે-
જળમાં કશું ન પશ્યત પગલાં વહી જવાનાં

—-દીપક ત્રિવેદી

એક અનોખો ખેલ રચાયો———દીપક ત્રિવેદી

એક અનોખો ખેલ રચાયો———દીપક ત્રિવેદી

એક અનોખો ખેલ રચાયો આસપાસ ને અંદર..
એમ છતાંયે ક્યાં સમજાયો આસપાસ ને અંદર ?
તળમાં શોધે ,સ્થળમાં શોધે, શોધે અડખે -પડખે ;
સકલ વિશ્વમાં એ સંતાયો આસપાસ ને અંદર !
બ્રહ્મ- સ્વરૂપે મળે જગતને, દશે- દિશામાં દીઠો -
ઋષિ -મુનિએ મહિમા ગાયો આસપાસ ને અંદર !
શું ઘૂંઘર? શું મોરપિચ્છ? શું મુરલી ?શું મટકી ?
ગોકુલ- વૃંદા નાચ નચાયો આસપાસ ને અંદર !
તારામાં છે ,મારામાં છે , આખા જગના ઈંડામાં છે -
સઘળામાં નખ- શિખ સમાયો આસપાસ ને અંદર!!!

—દીપક ત્રિવેદી

તું મથુરા તું જ કાશી——દીપક ત્રિવેદી

તું મથુરા ,તું જ કાશી——દીપક ત્રિવેદી

તું મથુરા ,તું જ કાશી
તું જ તારો છે પ્રવાસી !

જે ક્ષણોને ભોગવી, તેં-
એ જ તારા દાસ-દાસી !

ખુશ થવાનું સાવ સહેલું-
મૌનની ખોલો અગાસી !

જો સ્વીકારો હરક્ષણોને-
સુખ એ તો બારમાસી !

સત્ય શું છે શોધ' મા તું
ફેંક તારી તું ઉદાસી !

—દીપક ત્રિવેદી

સાંવરિયો વટનો કટકો -----દીપક ત્રિવેદી

સાંવરિયો વટનો કટકો -----દીપક ત્રિવેદી 

સાંવરિયો વટનો કટકો !
ઘડી-ઘડીમાં રિસાતો-ભીંસાતો એનો લટકો !

ફૂલ ખીલે અધમધ રાતે ને ભરબપ્પોરે કિટ્ટા
અક્ષરને બદલે ચીતરતો આડા અવળા લીટા
મધદરિયે કહેતો: ‘અટકો!’
સાંવરિયો વટનો કટકો !!

નહીં હોડી નહીં હલ્લેસું, નહીં ફૂલપદમણી રાણી !
પાંપણમાં રેડી ચોમાસું વરસે એક કહાણી !!
એ રહે, આંખને ખટકો !
સાંવરિયો વટનો કટકો !!

- દીપક ત્રિવેદી

કવિતાને પરણતા કવિને ———દીપક ત્રિવેદી

કવિતાને પરણતા કવિને ———દીપક ત્રિવેદી

લ્યો કરો શબ્દનો વેધ….ઉપાડો કલમ તીરની માફક રે !
ઉપાડો કલમ તીરની જેમ…ઉડાડો જળની ઊભી છાલક રે!

આમ જુઓ તો કન્યા ઊભી સરવરપાળે રોતી જી!
આંખોમાંથી શબ્દ નામનાં પલ પલ મોતી ખોતી જી!
લ્યો ધરો ભુજાઓ છેક…ઉઠાવો શબ્દ નામનો પાવક રે!
લ્યો કરો શબ્દનો વેધ….ઉપાડો કલમ તીરની માફક રે !

સ્મરણ-શ્વાસના દરિયા વચ્ચે છોરી તો ડગ માંડે હો!
છોરીને લઇ જાઓ પરણી કૌવત જેના કાંડે હો!

લ્યો મરો-જીવો કાં કહો…કવિતા એક રહી મનભાવક રે!
લ્યો કરો શબ્દનો વેધ….ઉપાડો કલમ તીરની માફક રે !

———દીપક ત્રિવેદી

તારાપણું મારાપણું —દીપક ત્રિવેદી

તારાપણું મારાપણું —દીપક ત્રિવેદી

તારાપણું મારાપણું
છે બધું ખારાપણું !
પાંચમાં ખૂંચે પછી -
થાય છે ગારાંપણું !
અંત ટાણે સૃષ્ટિમાં -
પૂજાય છે સારાંપણું !
છે ઉપરનું કોચલું -
ધોરાંપણું કારાંપણું !
પાડ નોખું જાતથી -
જીવ ! અંધારાપણું !
જ્ઞાનનાં આકાશમાં -
શેષ છે નકરાપણું !
ફૂલથી કાપી શકો -
નિજનું પથરાંપણું !

–દીપક ત્રિવેદી

બાકી સબ-કુછ ભયો… ભયો… છે !!———દીપક ત્રિવેદી

બાકી સબ-કુછ ભયો… ભયો… છે !!———દીપક ત્રિવેદી

પાદરકાંઠે એક નદી સુકાઈ જવાની ઘટના ઊંધેકાન્ધ બની ગઈ,બાકી સબ-કુછ ભયો… ભયો… છે !!

લાગણિયુંમાં વીંટાળેલી સોળ વરસની પરિયું અંતર-ધ્યાન બની ગઈ ,બાકી સબ-કુછ ભયો… ભયો… છે !!

થયો શ્વાસમાં કંપ , સુકાયા નીર, સુકાયા ક્ષીર, સુકાયા હીર,અચાનક કેવો ધરતીકંપ થયો રે…!!!

ડસે આંખમાં ડંખ, દિશાઓ ધુમ્માડે ઘેરાય , કશું ના કાગળિયે વંચાય ,સોંસરો ડંખ ગયો રે…!!!

ડૂસકાં પથારાવાની ક્ષણ તો ડાફું ભરતી, ઉછળીને બેભાન બની ગઈ,બાકી સબ-કુછ ભયો..ભયો..છે !!

પાદરકાંઠે એક નદી સુકાઈ જવાની ઘટના ઊંધેકાન્ધ બની ગઈ,બાકી સબ-કુછ ભયો… ભયો… છે !!

તપ્ત રેત ના તળિયા ઉપર સાંઢણિયુ નહીં દોડે એવી લોકવાયકા બનશેએના ખંડગીતો તરફડશે !

આંગળિયું ના ટહુકાઓ કંકુ-ચોખા નહીં ચોડે એવી દાંતકથા સળવળશે,એના ઘાવ છાતીએ ભળશે !

દુર ક્ષિતિજે ટોળામાંથી હરિયાળી છૂટીને કોઈની બાન બની ગઈ,બાકી સબ-કુછ ભયો… ભયો… છે !!

પાદરકાંઠે એક નદી સુકાઈ જવાની ઘટના ઊંધેકાન્ધ બની ગઈ,બાકી સબ-કુછ ભયો… ભયો… છે !!

———દીપક ત્રિવેદી

અધિકાર કોનો ?——દીપક ત્રિવેદી

અધિકાર કોનો ?——દીપક ત્રિવેદી

કહો સ્થળ કે જળમાં અધિકાર કોનો ?
વહેતાં વમળમાં અધિકાર કોનો ?

ક્ષણોને ઉઘાડી ન મૂકો ન ચીરો -
સમયના પડળમાં અધિકાર કોનો ?

પીવું છે હળાહળ ને તકલીફ પડશે -
એ નીલવર્ણ છળમાં અધિકાર કોનો ?

ઉછાળો ન સિક્કો મને બાતમી છે
ઉઘડતાં કમળમાં અધિકાર કોનો ?

નીચોવી શકાતું નથી આભ આખું
કહોને સકળમાં અધિકાર કોનો ?

——દીપક ત્રિવેદી

ઝરમરિયા ઝાલા——–દીપક ત્રિવેદી

ઝરમરિયા ઝાલા——–દીપક ત્રિવેદી

હેય …રાતી આંખે ઝળુંબિયાં …ઝળુંબિયાં સપનાં ચાર રે …ઝરમરિયા ઝાલા !!
આ ખાટોમીઠો શ્રાવણિયો …શ્રાવણિયો અનરાધાર રે ….ઝરમરિયા ઝાલા !!
આ લીલીછમ્મ પાંદળિયું …. હાથે પાંદળિયુંનાં ભાર રે ….ઝરમરિયા ઝાલા !!
આ સોનેમઢ્યું બેડલિયું …. ઈંઢોણીથી ઉતાર રે ….ઝરમરિયા ઝાલા !!
આ દીવા ઝળહળ ઝબુકિયાં .. કાંઈ સાંજકનો સુમાર રે ….ઝરમરિયા ઝાલા !!
આ ઝાલર હારે મોર ટહુકિયાં .. ટહુકાનો નહિ પાર રે ….ઝરમરિયા ઝાલા !!
કાંટો જડવત ભચ્ચકભચ્ચક … ધધકધધક જળધાર રે ….ઝરમરિયા ઝાલા !!
એક અંબોડો ઝાટકિયો …… અલ્લડ અંબોડે અંધાર રે ….ઝરમરિયા ઝાલા !!
આ હથેળિયુંનાં ચીરાં ચરરર ….. ભીંતો તેજલધાર રે … ઝરમરિયા ઝાલા !!
ફળિયે રેતી ઉની ધગધગ … પડછાયા ભેંકાર રે …. ઝરમરિયા ઝાલા !!

————–દીપક ત્રિવેદી