જામનગરવાસીનું પ્રણયગીત -----------દીપક ત્રિવેદી
સપના ! તારી આંખો જાણે જામનગરનું પૂર -- અમે હોબ્બેસ તણાયા છેક વચ્ચોવચ્ચ દરિયે !
સપના ! તારા શ્વાસે ટપકે પંચવટી ચોપાસ -- અમે તો .. હે .. ય .. તણાયા મઘમઘતી ઘૂઘરિયે !
પવન ચક્કીનો પવન સમયસર વા'ય -- અને જો તમે ઉડો આકાશ -- લઇ જાજો રે કાગળ સખીયન .... !
પંચેશ્વરનો પડઘો જો પડઘાય--અચાનક શ્રીબાલાહનુમાન આપણા થાય--લઇ જાજો રે શ્રીફળ સખીયન..!
સપના ! તારા રણજિત રસ્તે નાગમતીનું ગામ -- અમે તો .. એ .. ય .. તણાયા નાગમતીને તળિયે !
થાક ચડે તો મૂકો હવાઈ ચોક -- અને ચાલો રે ઠેઠ નગરમાં -- જ્યાં છે અનરાધારી હૈયાનો વરસાદ !
લાલબંગલેથી નીકળતા લોક તને જો પૂછે -- તો તું રસ્તા સાત બતાવી કહેશે પરીકથા એકાદ !
સપના ! તારી આંગળિયુંમાં કલરવતો મનમોર -- અમે બિન્દાસ્ત તણાયા જામનગરના ફળિયે !
સપના ! તારી આંખો જાણે જામનગરનું પૂર -- અમે હોબ્બેસ તણાયા છેક વચ્ચોવચ્ચ દરિયે !
-----------દીપક ત્રિવેદી
No comments:
Post a Comment